鄭秀文唞好身體疫後初出埠 9日旅程因急事縮至1日返港

Sammi鄭秀文 舊年5月不幸患上新冠肺炎，連7月嘅紅館演唱會都被逼要延期，Sammi亦專心休養暫停一切社交帳戶。喺2月6號，Sammi就喺社交平台分享同朋友喺機場嘅相片「一月初，見身體終於強壯番好多，於是決定去一次外遊，然後才展開2024年的工作。而地點是北海道二世古（mi從未去過北海道）」。

近日「重出江湖」嘅Sammi分享佢首訪北海道嘅經歷

屈指一算，Sammi話舊年因為未痊愈恢復，加上取消咗英國同韓國之行，所以佢可以話係前後四年未旅行過，所以Sammi話今次帶住感恩輕鬆嘅心情起程，原本計劃咗九日旅程，點知最終竟變成一天旅程，電光火石之間必須匆忙回港。

可惜因為媽媽突然不適，Sammi要急急腳返港

Sammi指「深深體會，人生總是充滿未知和變數。雖然如此，一天也是美好的回憶。而在上機時Mi自己又突發肚痾又嘔，幸得溫柔的空姐施以援手。謝謝你，溫柔的空姐。」

Sammi仲話要多謝溫柔體貼嘅空姐照顧喺機上又屙又嘔嘅自己呀

帖文文尾，Sammi道出趕返港原因「我必須趕回港，媽媽當時因急病入了醫院…….Long story, 稍後分享。」但係Sammi為免大家太替佢擔心，佢之後佢再標籤寫上「老媽子復原得很謝謝溫醫生醫治和謝醫生的關懷」、「謝謝至愛的團友對我處境的包容和體諒」、「二世古一日之旅」、「屙嘔估計是吃了沒有煮熟的生蠔」等。