五十歲生日與近千人慶祝 楊千嬅剖白幾年前低谷心情

今年生日對於 楊千嬅 嚟講係別具意義，因為係佢嘅50歲生日，千嬅選擇咗同近千名歌迷一齊度過，佢仲特別揀咗啲平時好少唱嘅歌。千嬅喺台上話無諗過自己唱歌會唱過半百，但佢同時好感恩又好感激，呢條漫長嘅路佢係過得非常精彩，佢亦感激歌迷多年嚟選擇咗佢嘅歌去陪伴成長。佢又承諾盡量控制情緒去唱好每首歌，因為已經有一段時間冇喺香港表演。


雖然千嬅講咗話唔喊，但當佢同歌迷傾訴心聲時都係忍唔住，講到早幾年經歷低谷嘅時間，面對網民評擊，甚至一度唔上網，需要時間處理自己嘅情緒，佢話當時見到一地都係碎咗嘅唱片，其實好心痛，不過就有好多歌迷私訊佢，其中一位仲將佢二十年嚟喺台上獲獎嘅感言剪輯成一條幾分鐘嘅短片。千嬅話自己一邊睇一邊喊，最後佢突然發覺自己有返能量。千嬅向每一位愛佢嘅人講，如果遇到咩困難，千祈唔好放棄。去到尾聲，全場大合唱，千嬅見到台下歌迷發放紫色紙炮同氣球香檳，佢喺台上都感動落淚。