StarTalk｜哨牙悍匪郭富城組織無稽械劫 小齊家棟唔怕打最怕城城口水

郭富城 一向演出嘅作品，大部份都係男子氣爆燈，不過今年新年，佢同 林家棟 任賢齊 就竟然一改作風合演動作喜劇《臨時劫案》更加不顧形象戴上一棚哨牙演出，呢日佢同家棟、小齊，就喺《StarTalk》同 王鎮泉 分享拍攝呢部新戲嘅笑料喇。

瘋癲扮嚴肅加上招牌哨牙，無論演戲經驗有幾豐富，小齊同家棟都話一望到城城尊容就難忍笑意，仲要不時避開亂噴嘅口水。其實本尊城城戴哨牙講對白一樣唔易，加上要背越南話仲要唱歌，呢日講起佢哋三個都話聽到一頭霧水，原來仲有兩位老師現場教咬字。

一場拉雜成軍嘅無稽劫案，小齊就嘆氣話家棟吓吓都真打，雖然話係喜劇，不過槍戰一樣係大場面，城城仲話同其他動作電影相比毫不遜色，仲係一鏡直落拍足一個星期，事前更做足準備，淨係綵排都足足用一日時間。

家棟亦提到拍攝時正正係疫情香港人心情最灰暗嘅時候，所以一眾台前幕後都希望拍攝一部喜劇，令大家重拾笑容，就算吃力勞累，都希望大家可以放鬆吓呀。