許濤率管理團隊向觀眾拜年 修哥繼續化身財神送好意頭

許濤率管理團隊向觀眾拜年 修哥繼續化身財神送好意頭

嚟緊星期六就係甲辰龍年嘅大年初一,而電視城今日就已經非常熱鬧,一眾藝人著到紅噹噹錄影充滿喜慶氣氛節目《龍舞雲祥年初一》。電視廣播有限公司嘅行政主席許濤亦率領一眾行政人員同大家拜年,而總經理(節目內容營運) 曾志偉 亦分享公司新一年嘅新寄望,佢話只要香港經濟好,自然就會多廣告,而疫情經已過去,所以經濟一定會慢慢變好。同時亦希望多啲好似《新聞女王》咁好嘅劇集畀觀眾欣賞,多啲好嘅綜藝節目為觀眾提供更多歡樂。

被問到會唔會邀請老友返TVB拍劇?志偉就話多咗唔少舊同事回歸演出,每次見面都會話開劇記住預埋佢哋,就好似日前嘅台慶頒獎禮,林保怡同羅嘉良都叫快啲幫佢哋寫劇本。今個農曆新年,志偉終於唔使出埠工作,可以專心享天倫,所以已經計劃好分別飛去台灣同加拿大,探望兩個囡囡曾寶儀同曾詠儀,佢話自己好耐未放過咁長嘅假,今次放十五日假就會飛去兩個地方喇。

修哥胡楓同阿姐汪明荃都有份參與錄影,修哥繼續化身財神為大家送上新年祝福,阿姐日前去辦年貨時就撞到好朋友李琳琳,修哥就大讚琳琳好有心,每次辦年貨嘅時候,都會預多一份送畀佢。至於一眾《中年好聲音》唱將大受客戶歡迎,周吉佩過年前後都有工作在身,所以未有時間陪家人去旅行,而支嚳儀就準備好年初一做完嘢之後,年初二就同家人飛去濟州島玩。

龍舞雲祥年初一丨汪明荃領軍拜年祝願大家好運來 眾星高歌Sing聲送舊年

甲辰龍年大年初一,TVB為大家準備新年特備節目《龍舞雲祥年初一》,主持汪明荃、胡楓帶領陸浩明、周吉佩、黃庭鋒、文凱婷、支嚳儀熱鬧拜年,祝願大家「龍舞雲祥」好運來!
新年特備節目《龍舞雲祥年初一》
節目甫開始,電視廣播有限公司行政主席許濤趁着大年初一發表新年賀詞,之後率領一眾行政人員進行舞獅點睛儀式,開心果胡楓則化身財神,向在場所有人士大派利是,場面熱鬧。

電視廣播有限公司行政主席許濤趁着大年初一發表新年賀詞。

汪明荃同修哥胡楓率眾人同大家拜年。之後輪到《亞洲超星團》51名超星練習生獻唱《新年快樂》送兔迎龍,一班後生仔又唱又跳,活力十足!

《亞洲超星團》51名超星練習生獻唱《新年快樂》送兔迎龍。
《東張西望》三位靚女主持吳幸美、梁敏巧同黎寬怡齊齊落區與眾同樂,仲會同街坊玩遊戲請食飯。至於《J Music》主持冼靖峰、潘靜文、莊子璇、何晉樂、彭家賢和林智樂就會獻唱《越唱越強》,祝廣大觀眾龍年越來越強!
《J Music》主持獻唱《越唱越強》。
劉丹同羅樂林將會率領《愛.回家之開心速遞》嘅「熊家」同「龍家」向大家拜年,劇組一眾演員大玩遊戲爭奪「金龍」,喺蒙眼鏟利是嘅遊戲入面,「熊家」派出呂慧儀、滕麗名和古佩玲出戰,單立文仲大搞爛 Gag 話:「又高 (指呂慧儀)又古佩玲,『高玲鏟婦』呀!」令大家捧腹大笑。
《愛.回家之開心速遞》一眾演員員大玩遊戲爭奪「金龍」。
廣受市民喜愛嘅《中年好聲音》,中一與中二生將會合體獻唱新年歌Medley,實行Sing聲送舊年,同場仲請嚟魔術高手招浩明化身財神表演魔術大送好意頭。《流行都市》團隊大歎新春賀年盛宴,《Hands Up》主持與小朋友齊齊玩賀年遊戲歡度新禧。節目仲請嚟麥玲玲師傅為大家帶嚟十二生肖運程預測,而《通靈之王》則會教你擺陣催運。

《龍舞雲祥年初一》2月10號 大年初一  11:30 翡翠台

《東張西望》三位主持吳幸美、梁敏巧同黎寬怡齊齊落區與眾同樂。《Hands Up》主持與小朋友齊齊向觀眾拜年。

 相關推薦

熱門搜尋