本尊就位丨甄采浠撒嬌色誘韋家雄 李芷晴晒葫蘆身形靠西柚減肥法保苗條

本尊就位丨甄采浠撒嬌色誘韋家雄 李芷晴晒葫蘆身形靠西柚減肥法保苗條

前晚(5日)及噚晚(6日)呢集劇情講述歸二娘(甄采浠飾)為氹金爺(韋家雄飾)買下「溫香玉院」,先後出動「餵提子」及「坐大髀高八度撒嬌」向金爺連環撒嬌,並有意無意間透露妓院驚人生意額,成功吸引金爺買妓院;當金爺以為雄霸黃賭毒三大範疇,卻發現因「瑤珠禁娼」政策、妓院倒閉機會極高,頓時火上心頭…自劇集開播後被譽為劇中「三大漏網美女」之一嘅甄采浠,除咗嗲功驚人,餵提子時更大晒美腿,保養得宜!

呢場戲一 take 過搞掂,勁!

甄采浠對如何均衡飲食勁有心得,難怪身形咁弗。

甄采浠受訪時笑言自己其實係「不懂撒嬌的女人」,並大讚韋家雄係好對手,即使親密場口,二人亦能「快靚正」完成:「雖然韋家雄好鍾意搞笑講爛gag,但佢係一個好專業同好敬業嘅演員,所以我哋一埋位,無論咩場口都好快就入到戲。噚晚嗰場,我哋之前排咗幾次,一埋位就一take過搞掂。」

甄采浠開心share教大家點樣食菜先至最健康。

甄采浠透露靠負重及帶氧運動雙管齊下保持苗條,戒糖及注意均衡飲食,並笑指被醫生指「吃菜太多」:「原來肉同菜都唔可以食太多,醫生話我食太多菜。例如好大塊葉嘅菜,係唔可以食太多,要食啲細葉嘅菜先得,因為細葉嘅菜冇咁濕,濕會令身體易積聚毒素。同埋唔可以淨係食菜嘅綠食部分,我自己食過一年嘅齋,我了解到食齋要食五色之餘,地上、地下同水入面嘅植物都要食,咁先均衡到營養。」

李芷晴連坐姿都刻意盡量模仿番民初時期嘅女性。

身邊美女如雲嘅金爺,家中正印夫人玉環(羅泳嫻飾)及妾侍昭君(李芷晴飾)亦備受關注,其中李芷晴亦係「三大漏網美女」之一。前年憑參加《香港小姐再競選》勇奪亞軍人氣躍升不少嘅李芷晴,喺劇中全程穿旗袍大晒完美葫蘆身形外,角色冇主見兼柔弱,更不時向金爺嘟嘴撒嬌,李芷晴舉手投足都有小家璧玉Feel,連坐低姿勢亦散發著濃濃古典味。

羅泳嫻特登戴唔同嘅水晶去襯番身上嘅旗袍。

飾演金家夫人嘅羅泳嫻(裸泳) 同樣憑競賽節目彈出,裸泳於2022年以命運占卜師身份參選《通靈之王》勇奪冠軍,勝出後人氣勁升,今次飾演金家夫人頗有發揮。經常以孖公仔姿態現身《本尊就位》嘅李芷晴及裸泳,獲不少網民指「撞樣」,李芷晴受訪時,笑言確實有唔少人係咁講;講到著旗袍嗰陣身形完美,李芷晴坦言拍劇前有刻意減肥:「因為造型係着旗袍,為咗出嚟個效果好睇啲,所以有特登食清啲減番少少,嗰時用咗一個西柚減肥法,每餐食半個西柚,食多啲菜,減少食澱粉質,有食肉,成效都唔錯㗎!」

李芷晴亦係「三大漏網美女」之一。

《本尊就位》逢周一至五晚八點半翡翠台播映

本尊就位|眾演員齊悼拍檔鄭啟泰 黎燕珊相識已久分享相處趣事

熱播喜劇《本尊就位》今日舉行宣傳活動,不過就因為有份參演嘅 鄭啟泰 日前不幸離世,令呢日活動嘅大家都一片哀傷,一班演員對同劇拍檔突然陰陽永隔都非常愕然, 黎燕珊 更指早喺亞洲電視年代已同「鬼怪」相識,樂天搞笑嘅佢永遠都會令現場笑聲四起,仲回憶當年逸事。

而 謝東閔 同 黃嘉樂 仲有 孔德賢 日前先同Eric齊齊參與宣傳,突然收到消息都覺得難以置信,亦希望Eric家人節哀順變。

近日另一熱門話題,一定係球王美斯訪港但並未獻技,有入場渴望一睹球王風彩嘅Brian,就話自己相當失望,亦認為有大部份入場觀眾都係希望一睹佢嘅華麗腳法呀。

劇組呢日選擇到廟宇祈福,希望一洗近日籠罩娛樂圈嘅憂傷氣氛,而扮演「呂洞賓」嘅Brian同Danny就話今日特別誠心,希望大家迎接新一年都開開心心喇。

 相關推薦

熱門搜尋