2024風生水起｜袁文傑愛睇波夫唱婦隨 葉念琛旺老闆發展音樂有得搞

薛家燕 陳懿德 許文軒 及 徐文浩 主持嘅風水賀年節目《2024風生水起》，邀請著名堪輿學家 李丞責 麥玲玲 元海 唐碧霞 同 黃楚淇 為觀眾指點迷津。今晚一集，「龍年開運搵師傅」就邀請埋 袁文傑、職業足球員 歐陽耀冲 擔任嘉賓。

身為星級球迷嘅袁文傑自爆個個星期都起碼睇幾十場波，搞到家燕姐都笑問佢：「太太有冇詐 型，你睇波多啲定睇老婆多啲？」而佢就即刻放閃話：「我睇乜，佢就跟住我睇乜！」之後佢又再請教師傅，問愛隊阿仙奴有冇機會奪得錦標，玲玲師傅就話：「今年九運降臨係離火運，紅色球衣較為佔優，所以紅色會着數少少。」

深愛足球嘅袁文傑呢日為愛隊阿仙奴請教師傅

玲玲師傅亦教大家睇運動員面相，佢指眉骨代表個人鬥志、鬥心， 眉骨高嘅人較大機會做運動員，而女人腮骨闊又代表咩呢？今晚留意節目就自有分曉喇。

呢集嘅「區區行大運」丞丞師傅就會帶隊到成衣業興旺嘅長沙灣，又分享龍年穿衣顏色宜忌。至於 碧霞師傅就細訴龍年最旺以及最弱行業，又會公開龍年股市較旺嘅月份同埋至旺號碼。另外 楚淇師傅亦提醒大家求關帝靈簽嘅注意事項，元海師傅就會教大家開工催運法，只要敲響銅鑼就可以有財招財、有煞化煞！

而年廿九播出一集，會邀請導演 葉念琛 同 蔣家旻 擔任嘉賓。玲玲師傅直指葉導面相旺老闆：「你個命係好旺老闆，老闆搵佢做嘢，由小公司變大公司！」師傅又會教大家睇旺老闆面相，耳頭形狀就係關鍵所在。

導演葉念琛則被指向音樂方面有利發展

玲玲師傅又批葉念琛命格利金，適合音樂相關工作，葉導仲笑言：「即係我要出道啦，等 《中年好聲音》第三季啦，我唔好意思話去《聲夢》！」師傅仲指名字部首有 「阝」、「金」同「氵」嘅藝人與葉導最合拍，到底邊個先係佢嘅「真命天女」呢？

而肖蛇嘅蔣家非常關心事業運，佢仲被批龍年有唔少機會出埠仲有男性貴人，至於姻緣運方面，玲玲師傅指家旻命格水泛木漂，適合較遠方嘅姻緣咁話。

丞丞師傅將同幾位主持直衝廟街等區

呢集丞丞師傅會帶大家遊尖沙咀同油麻地廟街，佢指尖沙咀陽地配陰水，有利女性相關生意，至於廟街就係鱷魚下水格局，適合發展娛樂同零售事業！元海師傅會教大家「旗鼓相當」風水陣增加名氣，再傳授 「五行加顏色，包你可升職」大法。碧霞師傅就會分享唔同命格嘅人點樣應用相對應顏色嘅銀包催旺運程，而楚淇師傅就推介大家去位於元朗嘅關帝廣場行大運喇。

《2024風生水起》星期一至周四 22:30 翡翠台