不如食豪D｜火火浪子變慈父！性教育夠直接 盲樁樁讀演藝「以為藝員訓練班」

由陸浩明（6號）、名廚楊尚友（Christian）主持；J2節目《不如食豪D》周一至周五晚九點半播映。每集請來不同嘉賓，根據佢哋最難忘、最有故事嘅菜式為基礎，藉Christian高超烹調技術配以高級食材，以超豪「回憶之味」跟嘉賓及觀眾分享！

最後兩集《不如食豪 D》嘉賓是導演火火。原來 Christian 的菜差點煮燶。

今晚（7日）《不如食豪D》來到最後兩集，一連兩集嘅終極嘉賓係導演李家榮（火火）。 火火表示最難忘一道菜就係母親「一品鍋」，所以Christian今次為佢炮製豪華版「動感念親恩」（沙參、羊肚菌、雞油菌、臘腸、隔夜肉餅一品鍋）。火火於演藝學院表演系畢業，喺節目將形體動作及作為導演嘅創意發揮得淋漓盡致。講到對「一品鍋」記憶，始於自己生日，佢笑指屋企不嬲唔慶祝生日，第一次慶祝係食媽咪整嘅一品鍋。佢指當時出動屋企gas爐，火火笑言︰「你知用得都係『大鑊嘢』，阿媽仲話係好嘢嚟，以前皇帝食。」接住火火慨嘆︰「好懷念，阿媽好早就……返咗大陸做嘢。」停頓位前已扣緊6號同Christian嘅情緒，當二人準備安慰時，火火卻嚟個反高潮。火火直言跟媽咪關係密切，目前仍會不時嗲媽咪，又指父母感到子女仍然需要自己，所得到嘅喜悅比送禮物都強。

火火在節目中由對話到形體動作都充滿戲味。火火外表粗獷，但仍喜歡嗲媽咪。

火火喺節目坦言曾係不婚主義者，曾發誓單身唔生育。諗唔到會結婚，並育有一女一子，佢笑言︰「而家仲係非常極度唔喜歡細路，其他小朋友唔好埋身。」被問到點樣同仔女灌輸性教育，火火直接了當︰「做咗11年老竇，係好擔心阿女。如果佢帶男同學返屋企入房溫書，我一定做老土嘢，到時到候就入房問佢哋食唔食糖水。」佢透露同11歲囡囡TinTin灌輸性知識︰「叫佢拍拖要小心，小心大肚。囡囡問點解會大肚，我話『你哋會唔著衫、會錫，跟住佢會將身體一啲部位進入你身體』。」非常簡單直接。

火火跟 Christian 一唱一和非常合拍。6 號預備了兩條「街市行情」問題考「住家男」火火。

此外，節目出現小插曲，當火火講到當年讀演藝學院竟然係無心之失︰「我同另一個同學以為係讀藝員訓練班，嗰時唔知咩叫舞台劇。」當火火想進一步講成做導演嘅因由，卻被節目導演叫停「不如講返嗰菜先」，令全場沉默咗一陣。原來各人只顧講，差啲煮燶餸。兩集節目猶如火火個人表演，非常精彩！

曾經是不婚不育主義者的火火，現在是位慈父。

《不如食豪 D》周一至周五晚九點半 J2（82 台）播映