/public/article/images/202402/96d825de-925c-4119-b9c1-c581394d641c.jpg)
莫文蔚 一向為公益同慈善事業投入唔少心血，近日佢就再一次認養亞洲黑熊，仲一口氣認養兩隻，分別取名為「莫家寶貝兒」(Bao Bear)同「自然」(Nature Love)。而近日佢舉辦嘅入行30周年「莫后光年概念展」亦展示自己對環保同愛護動物嘅理念。
Karen早喺2005就曾認養過一隻亞洲黑熊「寶貝」，期間多次親身探訪、參與唔同訪問同拍攝紀錄片宣傳，更為佢創作過《寶貝》呢首歌。「寶貝」2018年去世，Karen為紀念亦曾以大型人偶裝搬上演唱會舞台，緬懷13年嘅黑熊情緣。時隔6年之後karen再次認養亞洲黑熊，希望藉自己嘅力量呼籲更多人保護動物，珍惜地球所有資源。
Karen繼早年認養黑熊之後，近日宣佈再次認養
近年Karen聯同老公同家人一齊成立「莫理士愛心行動基金」(Morris Charity Initiative)，唔止宣揚動物福利，亦同時關注環保同援助兒童教育。最近因為香港保護遺棄動物協會(SAA)遷址遇到龐大資金問題，基金就捐款支持，為超過200隻被遺棄動物遷入新家貢獻心意喇。
近日佢嘅出道周年紀念展喺成都舉行，展出唔少非常有紀念性嘅物品
Karen近日為入行30周年舉辦「莫后光年概念展」，近日成都站就規劃全新展區，名為「看看世界」，展示佢對環保同愛護動物的理念，又展出自己創作嘅漫畫「莫貓寶貝」嘅起源故事。
概念展成都站，係展品最完整、規模亦係最大嘅一站，展出千禧年間Karen嘅重要時光同藝術創作，加上經典專輯卡式帶、CD、黑膠唱片同2005年由攝影大師 夏永康 操刀嘅攝影書《文丞武蔚》相片。加上歷年每一場巡迴演唱會嘅代表性同特別意義服裝。
除咗海報，仲有唔少經典舞台服裝都係展品
其中一張佢幾乎全裸、以長髮包裹身體嘅經典相片，成為展場焦點，亦係佢為保護野生動物所拍攝。Karen話：「基本上係全裸，我本來就長頭髮，再將頭髮加到非常長，用頭髮包裹住身體。我認為有頭髮可以裝飾自己，不需要再去殺害野生動物，以佢哋嘅毛皮來穿著喺身上，係完全沒理由同非常殘忍嘅。」
Karen話今次展覽希望大家都可以勾起唔同回憶
親自擔任策展人嘅佢，回望過去30年歷程，唔少回憶都瞬間湧現：「如果歌迷朋友嚟睇展覽，希望佢哋都會諗起唔少回憶，可能係唱片封面、照片、海報、剪報又或者係舞台嘅服裝，令佢哋諗起當時演唱會現場嘅畫面，或者聽到歌曲會諗起經歷過嘅一啲時刻，好開心我嘅作品可以陪伴大家成長。」
