愛‧回家丨劉丹率領熊家向觀眾拜年 Terry要求大龍生大小姐開工利是加碼

TVB處境劇《愛‧回家之開心速遞》呢個大家庭呢日浩浩蕩蕩現身戶外宣傳活動，大玩遊戲送上龍年祝福，一眾演員向觀眾拜年，劉丹（丹爺）幾年前定下初一團拜聚會規矩，最緊要一家人齊齊整整，丹爺每年與家人團年飯更會一齊食特製水餃。

大龍生羅樂林率領龍家為廣大市民送上祝福，兼且分享龍家新年習俗，大小姐林淑敏指每年佢哋都要逗「爸爸」大龍生嗰封利是，大龍生聞言就話一定會畀大家，三太樊亦敏又指龍家年年都咁開心、和氣生財，化解一切誤會，「Terry」李偉健希望今年大龍生、三太同大小姐開工嗰封利是加碼。