TWINS尾場獲容祖兒助陣 有意舉行Side Track演唱會

帶咗畀無數觀眾嘅回憶TWINS 14場紅館演唱會喺2月6號晚完滿結束，去到尾場 蔡卓妍 同 鍾欣潼 呢對孖女嘅狀態依然大勇，情緒仲越唱越高漲，仲放閃喺台上不停咀嘴，一開場就令到全場爆滿嘅粉絲叫到拆天。Twins同歌迷走過嘅22年有笑有淚，孖女亦感激粉絲成為佢哋嘅後盾，見到眼前粉絲嘅支持，阿Sa都話喺獻唱《下一站天后》時一度感觸想喊，不過佢哋就話唔係每晚都喊。

去到演唱會嘅尾聲，原本係座上客嘅容祖兒就現身舞台，阿Sa阿嬌仲突襲Joey獻吻，「龍虎豹」仲連唱快歌，兼且提早向粉絲拜年。完成14場演唱會，Twins都好興奮可以完成呢個壯舉，不過粉絲就明顯唔夠喉，即時群情洶湧，令到Twins再度上台，大家仲想有第三次安哥。

事後阿嬌話有諗過再上台，因為見到粉絲唔肯走，但係導演就唔建議佢哋再上台。嚟梗下半年會有巡迴演唱，講到計劃Side Track演唱會，會否今年內成事？阿Sa話再諗吓先，阿嬌話今次揀歌時就發現有好多Side Track歌曲好聽。