2024風生水起｜馮盈盈只關心龍年文昌運 揚言未來兩年謝絕拍拖

馮盈盈 作客節目《2024風生水起》，見到麥玲玲師傅喺度，當然就把握機會搵對方贈幾句，盈盈話準備向玲玲師傅詢問學業嘅運程，因為而家仲修讀梗一個碩士課程，想睇吓點樣可以學業進步，佢話自己上學期成績嘅平均分係A-，喺自己眼中成績只係中規中矩，因為之前考過更好嘅成績。玲玲師傅睇完佢嘅面相就話佢嘅額頭好飽滿，指佢好有讀書運，兼且下學期會拎到更好嘅成績。獲批有讀書運，盈盈話讀完碩士課程之後，都有意修讀其他網上課程，希望令到大家見到藝人都會努力去持續進修增值自已。

盈盈努力讀書同時，仲要兼顧事業，咁咪無時間拍拖，盈盈對住鏡頭話末來兩年絕對唔會拍拖，只係想集中事業同學業，如果桃花運係包括人緣，咁呢方面對於藝人工作有幫助嘅話，我都會歡迎，但係只係姻緣就唔使啦。踏入龍年，盈盈話自己生肖屬狗，本身就擔心有犯太歲嘅問題，不過玲玲師傅話作為藝人係唔使擔心犯太歲，反而對藝人嚟講有多啲新機會，令佢對新一年展望好樂觀。