玲玲友情報丨安德尊分享扮財神苦處 習慣儲起有福氣長輩利是

玲玲友情報丨安德尊分享扮財神苦處 習慣儲起有福氣長輩利是

每逢農曆新年都會以財神打扮亮相嘅「大王」安德尊,喺7號晚播出一集《玲玲友情報》同大家分享扮財神嘅趣事。大王話自己扮財神嘅時間,比另一位財神專業戶「修哥」胡楓仲要長:「入行第二年就做財神,做咗差唔多 30 年,其實辛苦你唔知。」
呢集請嚟大王安德尊做嘉賓。
佢透露辛苦嘅問題出自嗰頂財神帽,由於頂帽用竹枝或木條撐起,長時間戴會弄致頭痛,佢同行仔蔡景行講:「後生仔做會頂唔順,拍嘢6到10個鐘,你話頂唔頂得住,箍到頭痛。不過都有好處,嗰時啱啱出道無人識,但着住財神衫好受歡迎,啲人走埋嚟摸你,嗰種感覺好得意。」
大王可以話係財神專業戶。
安德尊自爆有個多年習慣,就係收到有福氣、名氣長輩畀嘅利是,都會儲起來,他笑住話:「儲到而家擺喺成日見到地方,係一種紀念。」麥玲玲師傅從玄學上分析,𢭃到有財福人仕嘅利是,可以沾到對方嘅好運,佢解釋話:「呢個係一個運氣傳遞,點解啲人咁鍾意收家燕姐、阿Bob、你同我嘅利是,就係咁原因。大家覺呢班人運氣唔錯,可以沾到對方好運。」玲玲師傅講笑話最好當然係𢭃到四大發展商嘅利是,福澤更佳。
大王指扮財神並唔係咁易。
佢又取笑以安德尊嘅身家,自然可以儲起呢啲利是唔用,接住佢又爆料話:「江湖傳聞大王好有錢,新界眼望啲地都係你嘅,你使緊面個浸啫。啲後生(指住黃紫恩同行仔)唔夠錢用就要拆,有頭髮邊個想做癩痢。」
行仔同黃紫恩向觀眾拜個早年。
此外,玲玲師傅拆解初一唔洗頭嘅謬誤,係緣於古時男女都留長頭髮同科技唔發達,佢解釋:「睇書研究過以前啲人好少洗頭,因為洗完頭冇得乾,無理由新正頭披頭散髮鬼咁見人,而家唔同有風筒,可以好快吹乾。」佢又揭露每到新年就知道 TVB 有好多員工,又試過第一年派利是給記者後,第二日就收到銀行打電話來道謝,原因係因為有記者影到佢派個封利是登咗報,銀行見到所以打嚟道謝。

《玲玲友情報》逢星期三 22:00  J2 82台

玲玲友情報|葉念琛公開傳授追女秘技 麥玲玲爆老公錄歌示愛似翻版

堪輿學家麥玲玲帶領黃紫恩(Jojo)、蔡景行(行仔)主持J2節目《玲玲友情報》,喺14 日播出主題為「情人節唔係咁樣過」,邀請咗導演葉念琛擔任嘉賓,佢一直擅長拍攝愛情陰暗面及互相背叛嘅電影,道盡男女間的爾虞我詐,喺節目中葉念琛一再提到靚仔溝女未必有著數︰「靚仔唔一定桃花旺,反而佢哋太孤芳自賞。」葉念琛喺節目上因為受唔住行仔盲頭烏蠅嘅追女仔方式,即刻過兩招追女秘技畀對方︰「你唔好成日問人食咗飯未喇,係打唔開話題。你直接 send『我愛你』,跟住話『send 錯,不過都係真嘅』。嚇一嚇佢,睇下乜嘢反應,或者佢都等緊你呢。」

前晚(14日)一集主題是「情人節唔係咁樣過」。

行仔事後表示未有使用對象,仲講笑話︰「或者 send『我愛你』畀導演,睇下下次有冇演出機會。」提到情人節一般都係同家人一齊過,當日各人都外出,佢就話︰「所以情人節為咗有啲活動,專登出門口一個人食咗個三人炸雞餐,其實都幾正㗎。」

前晚嘉實是導演葉念琛,導演葉念琛的電影揭露愛情陰暗面。

喺女性角度而言,Jojo 好認同葉念琛「靚仔唔係大晒」嘅理論,並列舉三項條件,只要具備當中兩項,追女仔就可以無往而不利︰「其實溝女三樣嘢,錢、口才、自信,有兩樣就點都贏。最緊要你唔需要靚仔,你夠自信有口才,夠膽行埋去女仔度,夠狼死啲女仔都肯扤頭。」玲玲師傅同葉念琛都同意女性欣賞幽默、搞笑嘅男朋友多過靚仔有錢。

行仔於節目中獲葉念琛面授追女仔秘技。

玲玲師傅早前與日本女團 Avantgardey 合作。而情人節撞正年初五,玲玲師傅接話每逢大節都會特別忙,當日一班人食晚飯度過,她笑說︰「新年嗰幾日都喺澳門做嘢,情人節嗰日專登返香港,主要係同內地歌手張哲瀚一班朋友聚聚,老公都有一齊。」玲玲師傅笑言拍拖時期,都有收過老公嘅花,現在已經「老夫老妻」唔興呢套,更笑指︰「情人節晚飯不嬲都係我張羅,你知老公係 IT 人咪搞啲程式,你一撳手機就彈啲花花心心出嚟。」玲玲師愽仲分享咗一次浪漫又搞笑經歷:「多年前老公錄咗一餅卡式帶去沙灘聽,啲歌聽落好怪,我仲問佢你買翻版?原來係老公自己唱。」雖然係咁,但玲玲師傅都交足戲表示非常欣賞。


玲玲師傅爆老公自製錄音帶示愛的往事。
節目《玲玲友情報》逢周三晚10點J2(82台)播映

 相關推薦

熱門搜尋