本尊就位｜尹詩沛 吳嘉儀妓女淪為民女 黃子桐學霸女強人神份揭秘

民初喜劇《本尊就位》7號晚播出嘅一集，劇情講述金爺（韋家雄飾）接手「溫香玉院」後覺得生意唔理想，要旗下妓女「分級制」兼推行「人盡其才」計劃，樣子標緻及受歡迎嘅蝴蝶（區明妙飾）及甘藍（黃子桐飾）被列為「尊貴公主級」，次一等嘅迎春（丁樂鍶飾）及桔梗（彭翔翎飾）被列為「平民淑女級」，經常坐冷板櫈嘅丁香（尹詩沛飾）及羽衣（吳嘉儀飾）被列為「普通民女級」。

被分級嘅妓女們，忍唔住搵雪花大吐苦水。

民女級除了工資最低，更必須早起晚睡任兼職幫補妓院生意，就算「淑女級」亦要額外抽空拍攝宣傳照，令原本生活優哉遊哉嘅妓女怨聲載道。
劇中佢哋要著到鬼五馬六拍宣傳照。
喺一班妓女當中，飾演甘藍、現年28歲嘅黃子桐Rachel 樣子標緻，今次係佢首度飾演青樓女子，並初次體驗旗袍，佢好多謝梁耀堅監製給予機會參加演出。另一方面Rachel同劇中一班好姊妹戲內戲外都好好感情，又大讚「金爺」韋家雄係名副其實嘅開心果：「佢無論開到幾夜都好精神，又會令我哋個個女仔都笑得好開心。詩沛姐同嘉儀姐好搞笑，佢哋成日問幕後妓女分級制係咪歧視佢哋，因為咁啱我同妙妙係最細嗰兩個，我哋咁啱又係公主級。其實我哋呢班姊妹完咗套劇，私底下都有約食飯維繫感情。拍攝時最搞笑係，我哋會成日提醒大家唔好食太多，因為着旗袍時會凸腩。」
韋家雄係大家眼中嘅開心果。
唔講大家可能唔知道，Rachel私底下係學霸一名，佢喺香港大學主修中文及犯罪學系，之後曾於醫療機構任營運主管，其間簽約無綫成合約藝人，曾於《愛‧回家之開心速遞》中飾演過超過十種不同類型角色，喺參與拍劇期間Rachel未有放棄學業，至2022年於香港中文大學完成碩士學位，主修公共衛生。除了學霸身份，Rachel原來十八歲已踏上老闆娘之路，好有生意頭腦，去年更獨資60萬港元投資美容院生意，為自己開創不同業務。

《本尊就位》逢星期一至五 20:30 翡翠台

Rachel現實生活中係一名學霸。