新城播鄭啟泰紀念特輯表哀悼 王雁芝：慶幸成最幸運最後一位

資深DJ鄭啟泰日前猝逝，終年56歲，消息令人震驚，有份同佢一齊主持電台節目《得閒High Tea》嘅愛徒麥皓兒Cayley、T-Max， 呢日喺Eric離世後首次開咪，佢哋更預留咗一張空櫈畀Eric，直播室氣氛即時顯得沉重起嚟。

新城廣播知訊台台長程凱欣率節目主持受訪時，透露資深DJ鄭啟泰曾經帶畀香港人好多歡樂，值得懷念：「我哋近日睇返鬼怪嘅片段，曾經主持嘅節目，聽返以前嘅點滴，發現咗好多我哋唔知鬼怪嘅一面，係廣播界嘅損失，我哋會永遠記得鬼怪嘅笑聲。」

作為Eric愛徒嘅Cayley同T-Max表示至今仲未接受到師傅離開，尤其係Cayley談及Eric時，更多次忍唔住哭成淚人，Cayley指近兩星期多次和Eric見面及做節目，又拍攝賀年相，完全未能接受事實，好希望對方能夠返嚟一齊開咪。

為咗感謝Eric 25年嚟對新城嘅貢獻，節目期間更播出《怪你過份美麗紀念鄭啟泰》特輯，Eric嘅未婚妻王雁芝，都有錄音分享佢同Eric昔日相處甜蜜點滴。王雁芝說：「認識Eric呢兩年係我人生中最自在、幸福、浪漫，好慶幸認識到佢，成為最幸運一位，亦係最後一位，能夠陪住佢到最後一秒，我會延續歡樂成為Eric 2.0，繼續開心、樂觀生活落去，I Love You鄭啟泰老公！」

而曾經喺Eric出書幫佢寫序嘅薛家燕，都對Eric離世感到好突然，由當初期待再同佢共事到最後收到MM靈王噩耗，中裡非常難受，家燕姐話：「記得1月30號我哋仲一齊拍賀年節目互相擁抱，啟泰仲話要鍚我一啖，估唔到收到呢個消息。」