高海寧未來盼組織義工團活動 網上分享瘀傷圖親解受傷原因

高海寧日前現身一個飯宴同一眾老友記食飯賀新歲，更邀請左基哥李龍基擔任嘉賓獻唱。唔講唔知，原來高Ling就係活動搞手，而佢喺上年更成立咗慈善隊同媽咪一齊做善事，更頻頻搞活動探訪長者同聚會。好有長輩緣同細路緣嘅高Ling，未來就希望可以做多啲關注長幼以及精神健康嘅慈善活動。

雖然高Ling致力做慈善，不過佢就暫時冇打算要成立涉及金錢嘅慈善基金，反而係希望之後可以組織義工團做多啲活動。

高Ling日前喺社交平台分享膝頭受傷嘅相，大片瘀傷令一眾粉絲好擔心。呢日高Ling就解釋受傷原因，係因為自己喺內地拍攝一個演員演技比拼綜藝節目時，因為太投入而不慎撞親，但自己都估唔到撞得咁嚴重，不過拍出黎效果好就足夠！高Ling仲話自己有個壞習慣，就係會反覆回想同檢討自己嘅表現，期望自己可以再做得好啲。