電影泉攻略｜賀歲片陪觀眾喜迎新春 張繼聰期待帶子女捧自己場丨EP89

王鎮泉 Jeoffrey  每星期為你提供最熱辣電影資訊，中外猛片專訪花絮上映時間全部集齊。「電影泉攻略」每周四買定爆谷陪你睇新戲。

新年最啱同一家大細入戲院欣賞賀歲片，亦總有幾部賀歲片係最令人難忘！鄧麗欣同張繼聰就同大家分享最愛嘅賀歲電影，作為人父嘅阿聰亦好期待帶2位小朋友入戲院欣賞佢主演嘅《飯戲攻心2》，為小朋友製造難忘童年回憶。

本周嘅新片速遞有：

《飯戲攻心2》，香港史上票房No.1喜劇嘅續集，今次就講到「婚姻是夢想，婚禮是硬仗」，當大佬「行出去，去遠啲」之際，二佬同三佬竟然擇定吉日，連搞三場世紀婚宴，結果婚宴發展成叔伯兄弟鬥獸場、姨媽姑姐嘅追星大會、勾義嫂風雲、超級揾錢大計......

《臨時劫案》，悍匪梅藍天(郭富城 飾）策動一場「閃電械劫」，陰差陽錯撞上籌劃買槍打劫嘅兩名廢中慕容輝（任賢齊 飾）及笠水（林家棟 飾）。梅藍天有感三人同是天涯淪落人，又為求成功，於是逼令二人結盟。但喺警方嘅追捕同三兄弟誤打誤撞下，掀起一場波濤洶湧嘅臨時械劫追逐戰…

《盜月者》，一個地下錶市場最大賊頭組織咗一個鐘錶盜竊團隊，打算飛到日本尋找收喺東京的時計物語錶行嘅三隻名錶，點知團隊內各懷鬼胎互不信任，一場危機重重嘅旅程亦隨即展開。

《鴨仔也移民》，鴨家一直過住單調刻板生活，爸爸滿足於同家人安穩地留在新英格蘭嘅池塘裡，直到永遠；但媽媽渴望改變現狀，帶鴨仔、鴨女見識外面廣闊世界。終於有日佢地決定向南方出發，途經紐約前往熱帶牙買加，但行程途中多番碰釘，鴨家最終可唔可以齊齊整整，成功著陸牙買加呢？

DC影業經過不停重整後，新嘅DCU宇宙已經籌備得如火如荼，而第一部作品就係超人系列電影《超人：傳承(Superman Legacy)》，預計今年三月，但預告片今年仲未有得睇住。而大部分角色已經定好，包括由David Corenswet飾演超人，Isabela Moner飾演鷹女。預計電影將於2025年上映。

票房戰況：截至2月7號中午，第3位劉德華、梁朝偉主演既《金手指》；第2位由Bryce Dallas Howard主演既《特工亞皆老》；第一位，由安妮亞一家聯手炮制嘅最新冒險《劇場版SPY×FAMILY CODE: White》