J Music｜薛家燕澳門開騷邀佘詩曼做嘉賓 潘靜文破被莊子璇取替傳聞

薛家燕上年憑改編BLACKPINK成員Jisoo嘅歌曲《Flower》而被網民封為「港版Jisoo」，呢日家燕姐作客音樂節目《J Music》，唔只演唱同馬來西亞女歌手茜拉Shila Amzah合作嘅賀年歌，更同潘靜文Sherman、劉穎彤、蔡愷穎齊齊熱唱香港女團歌曲。為咗唱好呢首歌，家燕姐仲練到發夢都喺度唱添！

年初八家燕姐就會去到澳門開騷喇，人緣極廣嘅家燕姐都邀請咗一班好友擔任嘉賓，包括王梓軒、陳慧嫻、陳小春、《聲夢傳奇》畢業生、阮兆祥等。不過最令人期待嘅，就當然係家燕姐同《十月初五的月光》劇中囡囡佘詩曼同台！家燕姐好感謝阿佘喺百忙中抽時間為佢站台，亦好開心到時可以同一班好友、後輩相聚同歡。

早前Sherman因為缺席《J Music》而被傳主持一職由港姐冠軍莊子璇取替，難得兩位當事人同場，佢哋都趁呢個好機會向大家澄清誤會。其實Sherman係因為有工作在身所以先會缺席一集，由Hilary做代班主持頂上。Sherman亦有喺社交平台出post解釋兼派定心丸，大家未來仍然可以喺節目見到佢。

Lolita同Angel曾經係家燕姐嘅才藝學校學生，而家可以同家燕姐合作，都令佢哋啲回憶返曬嚟，仲話最記得當年家燕姐教佢哋表演最緊要係要笑！