任暟晴踏入18歲首要事項 42日內換領成人身份證

上個月22號係任暟晴嘅18歲生日，佢嘅粉絲同家人特別為佢舉行派對補祝生日，獲得大家嘅疼愛，Jasmine就以自己嘅歌聲答謝大家，佢話見到咁多人同自己慶祝感覺好窩心，因為成世人都未試過咁多人同自己慶祝，仲大讚大家將會場佈置到好似主題樂園咁靚。正日生日，Jasmine話自己要返學，先係獲一班同學送上精美蛋糕驚喜慶生，放學之後就同家人食飯慶祝。

踏入18歲，好多人都諗定好多嘢想做，Jasmine就話無乜特別嘢想做，不過就要喺42日內安排時間去換成人身份證，亦會抽時間去考車牌。

嚟緊就要考IB（國際文憑考試），Jasmine話會閉關應考至5月份，但原來佢已經收到大學取錄嘅通知，所以心情都會輕鬆啲。佢又講到就快畢業，心情已經好唔捨得班同學，因為兩班同學一直感情好好，平時又會組隊參加舞台演出，一諗起將來無得成日見面就好唔捨得。