《聲夢》《中聲》唱將夥港姐初一獻舞 超星團練習生紅內褲催旺運氣

TVB準備咗一連串精彩節目同觀眾一齊度新歲，其中一個節目就係直擊大年初一舉行嘅花車巡遊匯演，仲派出三大王牌節目，包括《聲夢傳奇》、《中年好聲音》同《亞洲超星團》嘅唱將，仲有一眾香港小姐會參與演出。

為咗表演更加精彩同順利，一眾歌手演員齊集綵排，當中唔擅於跳舞嘅《中聲》唱將專心落力練舞，佢哋喺新年前後非常忙碌，周吉佩話陪唔到仔女有啲失落，因為以往過年係一齊過，佢坦言近排同仔女見面都好似份外珍惜。李佳就話陪唔到家人慶祝新年，但家人能夠透過電視機見到佢演出都係開心事。講到龍年嘅願望，羅啟豪就希望盡快推出新歌，而李佳之前錄咗首翻唱歌，希望快啲拍MV推出，而支嚳儀好期待嚟梗拍攝自己首個MV。

綵排上一連串舞步，林智樂（Felix）就話已經超出佢嘅極限，身邊嘅彭家賢話好彩有Felix企喺佢前面，所以感覺好開心。侯雋熙同劉芷君認為喺一個大嘅表演場地同咁多人一齊演出係一個好新嘅體驗。近日香港嘅氣氛只係得十幾度，所以一班港姐們早有準備，諗定預寒措施，姜嘉琳話而家有啲叫光腿神器，所以考慮著類似絲襪保暖，蘇韻姿又提議喺裙入面貼滿暖包，貼到好似腹肌咁。

一眾《亞洲超星團》練習生雖然年紀輕輕，但係佢哋對於紅色內衣褲催旺運氣嘅傳統深信不疑，區珀豪話紅色一條龍，方玉亨都話自己有準備，但係張鎬濂就話未有，點知區珀豪竟然豪氣話借條畀佢。