被張繼聰翻出跳舞舊片 張家輝勸大家畀佢平安渡餘生

鄧麗欣、張繼聰、林明禎、陳湛文、王菀之、魏浚笙主演嘅賀歲電影《飯戲攻心2》呢日舉行首映，張家輝、米雪、廖子妤、譚玉瑛等都有現身捧場。

家輝呢晚係應張繼聰邀請出席，眾人見到佢現身都非常驚喜。提到阿聰話之前考古，搵返家輝以前載歌載舞嘅舊片出嚟，家輝聽到後話其實有啲片自己都已經唔記得咗，佢搞笑咁叫大家唔好再搞呢啲嘢：「畀我平平安安咗渡過埋我嘅餘生。」令在場眾人捧腹大笑。

可以邀請到家輝嚟自己主演嘅電影首映，阿聰就興奮到話以後會全勤出席對方嘅電影首映，至於講到視家輝為老師嘅原因，阿聰話自從拍完對方執導嘅電影後，每次自己拍戲上遇到有困難，都會打畀對方請教，所以覺得對方係自己其中一位老師呀。而首次同家輝見面嘅陳湛文，就話如果有機會可以畀對方指導一下就非常好。Stephy就表示咁耐以嚟都未正式同過家輝合作，但對方畀佢嘅感覺就相當親切，而已經同張家輝合作過嘅王菀之，指上次合作嘅戲份太短，希望下次可以長啲呀！

講到喺農曆年期間嘅謝票安排，Jeffrey就話自己準備咗墨寶，而明禎就話到時會着旗袍現身，除咗因為有新年氣氛外，仲覺得着旗袍係一種福氣，至於問到Jeffrey到時會唔會一齊着？佢就笑言自己太大隻，如果佢着旗袍會撐爆件衫呀！