被張繼聰翻出跳舞舊片 張家輝勸大家畀佢平安渡餘生

被張繼聰翻出跳舞舊片 張家輝勸大家畀佢平安渡餘生

鄧麗欣、張繼聰、林明禎、陳湛文、王菀之、魏浚笙主演嘅賀歲電影《飯戲攻心2》呢日舉行首映,張家輝、米雪、廖子妤、譚玉瑛等都有現身捧場。

家輝呢晚係應張繼聰邀請出席,眾人見到佢現身都非常驚喜。提到阿聰話之前考古,搵返家輝以前載歌載舞嘅舊片出嚟,家輝聽到後話其實有啲片自己都已經唔記得咗,佢搞笑咁叫大家唔好再搞呢啲嘢:「畀我平平安安咗渡過埋我嘅餘生。」令在場眾人捧腹大笑。

可以邀請到家輝嚟自己主演嘅電影首映,阿聰就興奮到話以後會全勤出席對方嘅電影首映,至於講到視家輝為老師嘅原因,阿聰話自從拍完對方執導嘅電影後,每次自己拍戲上遇到有困難,都會打畀對方請教,所以覺得對方係自己其中一位老師呀。而首次同家輝見面嘅陳湛文,就話如果有機會可以畀對方指導一下就非常好。Stephy就表示咁耐以嚟都未正式同過家輝合作,但對方畀佢嘅感覺就相當親切,而已經同張家輝合作過嘅王菀之,指上次合作嘅戲份太短,希望下次可以長啲呀!

講到喺農曆年期間嘅謝票安排,Jeffrey就話自己準備咗墨寶,而明禎就話到時會着旗袍現身,除咗因為有新年氣氛外,仲覺得着旗袍係一種福氣,至於問到Jeffrey到時會唔會一齊着?佢就笑言自己太大隻,如果佢着旗袍會撐爆件衫呀!

林家棟新春忙劇本通宵開會 張繼聰賀歲兩片成績佳

香港專業攝影學會 舉行周年晚宴,呢晚 林家棟 周家怡 張繼聰 劉偉強 錢嘉樂 楊偲泳 等電影人都現身參與,正創作新劇本嘅家棟雖然啱啱先忙完賀歲片宣傳,不過就已經埋頭創作新劇本,不過就因為故事繁瑣,所以要盡快開拍都唔係一件易事咁話。

阿聰呢日就以演藝人協會新任秘書長嘅身份出席,仲話受到前輩影響,希望為業界出力,仲有唔少大計呀。而佢有份演出嘅兩部賀歲片成績都非常唔錯,阿聰就話希望觀眾支持香港電影,繼續入場支持呀。

 相關推薦

熱門搜尋