StarTalk丨黃婉君相隔18年出歌 挑戰跳唱獲老公仔仔支持

Rosanne黃婉君作客《StarTalk》接受主持許文軒訪問暢談新歌，當年同妹妹Race黃婉佩組成女子組合2R進軍樂壇，數數手指，Rosanne係相隔18年再出新歌，佢都講到今次出歌兼單飛其實源自佢接拍咗一個韓國嘅代言人洗頭水廣告，廣告入面佢會獻唱，但又覺得唱其他人嘅歌會怪怪地，加上妹妹之前都出過自己嘅作品，所以就鼓起勇氣出首國語歌。由於唔想再做玉女形象，所以就推出快歌，仲挑戰自己咁大個女先去學跳舞。

Rosanne認為又跳又唱係最大挑戰，處於排舞階段嘅佢自爆仲未做到又唱又跳，因為一直以嚟佢都無跳舞根底。講到當年2R嘅時候都有推出快歌，佢話當年只係擺吓甫士，無乜點跳。Rosanne形容要跳得好，真係要練到好似行路咁自然，要練成千次以上，佢又唔敢評論自己而家跳到咩程度。

至於會唔會再以2R名義出歌同開騷，Rosanne直認有少少難度，因為同妹妹都各自有家庭，自己亦兼顧梗生意。話雖如此，Rosanne承認有心郁郁，亦試過有主辦方洽談開騷，不過對方講要三個月時間準備同開騷，姊妹兩人考慮之後，真係抽唔到咁長時間去做騷。

Rosanne覺得好對唔住一班粉絲，因為好少機會同佢哋見面，當年同妹妹退出樂壇後就結婚生仔忙於照顧家庭同生意，真心覺得係忽略咗粉絲多年嚟愛戴同支持。嚟梗係2R嘅21周年，佢哋都覺得應該再出嚟唱吓歌。佢又話老公係支持佢出新歌，加上今次係自資出歌同製作，每當佢拎新歌返屋企同老公及仔仔聽嘅時候，佢哋都畀好多意見，慢慢就變成一個家庭製作出嚟嘅作品。


一對仔仔分別12歲同10歲，Rosanne喺佢哋細個嘅時候都有畀自己以前嘅MV仔仔睇，唔知點解仔仔睇完媽咪嘅作品會覺得尷尬怕醜，Rosanne話老公出鏡同做司儀都好自然，不過仲兩個仔仔都無遺傳任何佢同老公嘅表演基因，雖然仔仔無表演才華，但佢哋就好欣賞媽咪嘅演出，尤其每次練舞之後，仔仔都讚佢有進步。