蔡穎恩被連家穎廚藝嚇親 見證對方炮製芝士蘿蔔糕

入得廚房出得廳堂嘅蔡穎恩相約「長腿師妹」Me&成員連家穎炮製蘿蔔糕慶新春，但係對住師妹嘅刀功，Evelyn不敢恭維，仲問現場有冇急救箱，又不停確定Vian切嘢嘅手勢應該要點。Evelyn好奇Vian上家政堂嘅情況，仲問對方嘅拿手菜係乜？Vian話係超重口味意粉「我嗰時家政攞A，因為老師好鍾意重口味，我專登買啲勁重口味嘅意粉醬去考試。」Evelyn一臉疑惑問：「你學整意粉，但買現成嘅意粉醬？」

經過一輪既驚險又搞笑過程後，佢哋終於完成白蘿蔔。蒸蘿蔔糕後開始煎糕環節，創意十足嘅Vian話要嚟個新舊合壁，整香煎芝士蘿蔔糕，現場散發濃郁芝士香，煎至金黄色的蘿蔔糕咬落「索索聲」，香脆可口。Vian揈着手表示「好味到跳舞」，再瞇起雙眼笑說：「好味到Hang機」。