黃夏蕙以大戲造型上頭炷香 祈求香港人人有工開有屋住

每逢農曆新年都會以特別造型，去到黃大仙上頭炷香為香港市民祈福許願嘅黃夏蕙，即使前年移居美國唔喺香港，佢都有隔空上香。回流香港後夏蕙BB立即歸位，喺大除夕以一身大戲裝踩落到黃大仙，雖然比過往嘅生肖造型失色，但絕對係誠意十足！

夏蕙BB話自己呢日係小龍女造型，而手上戴住嘅佛珠就係準備嚟送畀市民大眾，講到舊年因為唔喺香港而缺席上頭炷香，夏蕙BB就話相當掛住大家，仲話因為年年都會見到傳媒同參拜嘅市民，缺席一年真係令佢掛到不得了。

呢日夏蕙BB雖然打扮靚靚，但係佢把聲就變得沙啞，少不免令大家擔心，夏蕙BB就話因為前一晚做演唱會太盡力，所以把聲先會變得咁磁性，佢叫大家唔使擔心，因為好快會好返呀！講到新年嘅安排，夏蕙BB話由年初一到年初十都已經安排好晒活動喇，至於問到有咩祝福送畀香港市民？夏蕙BB就希望世界和平，人人都有工做有飯食有屋住，最重要係大家都身體健康。

而陪同夏蕙BB嚟上香嘅兩位契女艾美琦同李子彤，就話契媽一早講咗今年要扮小龍女，需要兩位侍婢陪伴，但就講明叫佢兩個唔可以搶佢風頭。