周星馳教大家新式𢭃利是手法 再為眾善信送出心想事成符

舊年向網民派發「心想事成」墨寶嘅周星馳，喺大年初一再向一眾「善信」派福利，話只要大家喺佢嘅社交平台留言講出別出心裁嘅賀年說話，就會隨機送出佢嘅「心想事成符」。

而為咗證明呢張「心想事成符」嘅威力，星爺就拍咗條片，話係一眾舊年求得此符嘅善信，個個都已經飛黃騰達，所以專登返嚟還神。以往都係老闆向員工派利是，但係喺星爺嘅片入面，就反轉員工們個個恭恭敬敬排隊向星爺交利是，但其中一位員工抱拳向星爺祝賀後，因為冇送上利是而畀星爺叫停，仲講出經典金句：「喂！靚仔大晒呀？」呢位員工即時雙手遞上利是，睇嚟大家可以向星爺學下呢招新式𢭃利是手法！