胡定欣今年棄桃花選擇離港外遊 曾比特急性肌肉發炎要坐輪椅到場

胡定欣今年棄桃花選擇離港外遊 曾比特急性肌肉發炎要坐輪椅到場

大除夕晚一眾賀歲電影《臨時劫案》嘅演員胡定欣、梁仲恆、陳毅燊、曾比特同符家浚嚟到戲院謝票,阿Mike仲撐住拐杖現身。

定欣話因為年尾大家都好忙嘅關係,所以已經提早同家人食咗團年飯,佢又話農曆年期間會離港外遊嘅關係,所以冇買年花同桃花。對於今次嚟到戲院謝票,定欣就話好期待同觀眾交流,想了解大家睇戲時嘅笑位喺邊呀。

坐住輪椅到場嘅Mike,透露自己係急性肌肉發炎,瞓醒後喺床上完全郁唔到,搵朋友幫手嘗試企起身時,因為劇痛爭啲暈低,最終要call白車送院,Mike話打完止痛同消炎針之後已經好返好多,仲話好彩喺工作前可以行到出院。而ANSONBEAN就話自己呢日做護草使者,負責孭住Mike上上落落周圍走呀。

電影泉攻略|占基利回歸《超音鼠大電影3》 畢彼特將演出昆頓塔倫天奴最後執導作品丨EP90

王鎮泉 Jeoffrey  每星期為你提供最熱辣電影資訊,中外猛片專訪花絮上映時間全部集齊。「電影泉攻略」每周四買定爆谷陪你睇新戲。

有睇過超音鼠電影系列嘅朋友,都知道入面飾演大壞蛋蛋頭博士嘅占基利畀超音鼠打敗咗,但係喺最後彩蛋入面,似乎見到佢仲生存緊,所以大家都諗喺第3集入面占基利會唔會參演,點知占基利早前爆出希望退休嘅言論,大家就諗佢應該唔會演出,不過喺最新年推出嘅《超音鼠大電影3》預告片入面,去到最後竟然聽到蛋頭博士嘅邪惡笑聲,間接證明占基利會回歸參演,而呢場鼠蛋大戰將會喺年底上映!

本周嘅新片速遞有:

《Madame Web蜘蛛夫人》,係「蜘蛛俠電影宇宙」嘅首部女性超級英雄電影。曼克頓救護員嘉絲,亦係擁有心理感知及預知未來能力嘅蜘蛛夫人,喺某次救護行動令佢同三位陌生女孩嘅命運交織,佢要被迫面對自己嘅過去外,同時亦要帶領女孩們喺有限時間內對抗未知嘅強敵!

《快一秒的他》喺郵局工作、快世界一秒嘅皇一,遇上總係慢世界一秒嘅女仔麗華,到底自帶時差嘅佢哋,可唔可以搵到自己嘅幸福呢?

《熊抱青春記》13歲少女李美蓮 ,除咗要面對踏入青春期身體、性情、人際關係嘅急劇變化外,心浮氣躁嘅佢,一激動就會變身成巨型小熊貓!

鬼才名導演Quentin Tarantino之前發表過,佢整個人生只會執導十部電影,之後就唔會再執導演筒,而佢最後一部執導嘅,將會係《The Movie Critic》呢部電影,最近亦進一步確認咗會搵嚟Brad Pitt參演,而題材將會係以Tarantino年輕時,曾經擔任色情雜誌販賣機補貨員嘅經歷為籃本。不過Tarantino一生只指導十部電影嘅言論,令好多影迷喺度數,發覺嚟緊呢部將會係Tarantino第11部電影,原來Tarantino當年嘅《標殺令》1同2,佢係當一整套電影嚟看待。

今個星期票房戰況:截至2月14號中午,第3位《臨時劫案》;第2位《盜月者》;第一位,《飯戲攻心2》

 相關推薦

熱門搜尋