王浩信姚子羚率《狀王》演員廟街玩遊戲 中聲歌手傾力獻唱年三十晚大晒冷

TVB藝員及歌手喺年三十晚齊集油麻地，同市民一齊倒數迎龍年，雖然天氣寒冷，不過現場氣氛既溫暖又熱鬧，王浩信同姚子羚率《狀王之王》演員宣傳造勢，同場仲有李龍基、呂珊、《中年好聲音》歌手支嚳儀、顏志恒、羅啟豪、林鉫徫、丁文俊、魏嘉信、李佳、龍婷、吳大強及周吉佩等，佢哋好開心同藝員們一齊倒數迎新春。

支嚳儀指上年呢個時間因眾人要努力準備出戰比賽，心態同今年好唔同，而羅啟豪就透露新歌正籌備得如火如荼，林鉫徫年三十晚通常同家人食飯後就去行年宵；《中年好聲音2》唱將顏米羔、黃劍文同陳蒨葶亦有份輪流上台獻唱，佢哋喺附近食嘢更被街坊認出，邀佢哋一齊合照。

吳大強呢日同李龍基、林鉫徫、丁文俊及魏嘉信合唱《勝利雙手創》，大強指同基哥合作過幾次，有基哥帶住唱得特別有信心；身穿古裝嘅王浩信同姚子羚就向觀眾拜年，與演員們一齊玩遊戲，又有一啲小趣劇。

黃美棋同文凱玲兩位準人妻，笑指今年仲可以努力逗利是，文凱玲笑指被長輩催結婚生B，足足催促咗廿年，而郭柏妍讚親戚好識趣，冇特別問感情事；謝東閔同孔德賢就幫《本尊就位》宣傳，坦言冇諗過收視成績咁好，絕對係今年新年嘅一個好開始。