Gigi拜年賀新歲 龍年開騷籌備首張專輯

Gigi拜年賀新歲 龍年開騷籌備首張專輯

噚晚大年初一同一眾表演者一齊參與花車巡遊嘅 Gigi炎明熹 趁住大年初二同大家拜年,祝福大家心想事成。

總結兔年,Gig發展可以話係大豐收,既成為大學新鮮人亦舉行了首次個人演唱會,早前亦宣佈4月將再次展開個唱,對踏入龍年,Gigi亦已為自己訂下了新一年目標喇。
 
Gigi話:「兔年最難忘係開咗我人生第一個售票演唱會,我覺得好榮幸,同埋好開心可以見到大家,踏入龍年,除咗要繼續努力讀書,考到好嘅成績,工作上都希望有更多唔同嘅突破,今個龍年我有個小心願,希望可以推出自己嘅個人大碟,呢個係我龍年最想完成嘅目標。」
 
為籌備自己首張個人大碟,Gigi心情亦非常興奮:「想遇到更多好嘅監製、出色嘅音樂人,遇到自己鍾意、樂迷又鍾意嘅好歌,因為出一張大碟,要集合好多歌先可以完成,所以要花更多時間,同我嘅音樂團隊溝通。」
 
早前接連以《Little Magic》連奪兩台「勁爆歌曲」同「叱咤專業推介十大」之後,為劇集《新聞女王》首試英文歌曲《Crystal Clear》亦奪得「最佳電視歌曲」,Gigi坦言都係音樂團隊努力嘅成果,期望可以繼續推出更多廣受大家喜歡嘅歌曲。

炎明熹新年回鄉4日度新歲拜年 食賀年糕點討好意頭

炎明熹(Gigi)呢日為警隊喺西九文化區舉行提子海陸空大匯演活動擔任表演嘉賓,會場佈滿警隊吉祥物提子大型戶外裝置藝術展覽,向市民宣揚防騙訊息,更有1200架無人機喺維港上空表演。

公眾可以喺2月17日至2月23日期間前往展覽完成簡單任務獲取禮品,警務處處長蕭澤頤致詞時,希望市民提防騙子,今年係警隊180周年,口號係「守護我城,跨越180」,之後Gigi上台唱《Little Magic》,又即場畫吉祥物。

Gigi透露曾有朋友受騙,慶幸最終冇上當,Gigi平時忙於學業同工作,趁住今個農曆新年抽空回鄉4日度新歲,向親友拜年同飲茶,Gigi雖然新年期間食少咗嘢,不過佢都有食賀年糕點討好意頭。

 相關推薦

熱門搜尋