七公主x四朵金花|後輩向仙姐拜年超熱鬧 王愛明現身公主金花齊聚

七公主x四朵金花|後輩向仙姐拜年超熱鬧 王愛明現身公主金花齊聚

龍年來臨 TVB娛樂新聞台 敬祝各位 龍騰萬里、福星高照、心想事成、百業興旺、財運亨通、身體健康。

每年新年都係大家同親友共聚嘅好時間,好似 汪明荃 就喺年初二同老公 羅家英 拜訪粵劇大前輩白雪仙,唔止遇上 馮素波 蕭芳芳 薛家燕 等「七公主」成員同 劉千石 同場,就連近年甚少露面;既係七公主又同Liza姐一樣係「四朵金花」成員嘅王愛明,難怪佢哋咁高興啦。

Liza姐同家英哥初二向仙姐拜年

七公主由粵語片年代嘅幾位童星包括馮素波、沈芝華、陳寶珠、蕭芳芳、薛家燕、王愛明同馮寶寶根據年齡長幼而結拜而組成。到70年代《歡樂今宵》節目中就由沈殿霞、汪明荃、王愛明同張德蘭組成四朵金花呢個女子組合,不時會表演歌舞,後來仲一齊演出電視劇同推出唱片。

同場仲有蕭芳芳等「七公主」成員仲包括近年甚少露面嘅王愛明

其實大年初一Liza姐屋企先舉行完非常熱鬧嘅大型團拜,成50人齊齊到訪拜年,仲包括 陸浩明 同女友、黃建東同媽咪仲有 黃庭鋒 ,場面超熱鬧。

大年初一Liza姐同家英哥先舉行大型團拜,幾十人一齊迎接龍年非常熱鬧
6號同女友亦都有參與

亦包括黃建東同媽媽

仲有黃庭鋒

薛家燕手拖孫仔跳舞助慶 聯同七公主姊妹向仙姐拜年

日理萬機嘅薛家燕只要見到孫仔Julian就完全被融化,兩嫲孫手拖手出席活動,聯同一大班小朋友跳舞,年紀小小嘅Julian仲口齒伶俐同大家拜年,家燕姐話日前到澳門出騷時,Julian都有跟埋一齊去,佢仲讚嫲嫲唱歌好聽,原來只要聽到《皆大歡喜》就會起舞。

喺情人節大年初二嘅時候,同七公主嘅姊妹一齊去到仙姐白雪仙屋企拜年,幾位姊妹結義金蘭超過半世紀,感情不變,家燕姐話因為陳寶珠同沈芝華喺大年初一已經向仙姐拜年,所以大年初二只得佢同蕭芳芳、馮素波同王愛明,大家就好好奇問點解唔見馮寶寶,家燕姐就解釋因為Bobo喺馬來西亞居住,多謝大家關心姊妹,佢指Bobo生活好好。家燕姐話難得見到仙姐,大讚對方好精神好靚,又好有心準備咗好多糕點、麵、點心同粥照待大家,佢話最難得係撞到阿姐汪明荃同家英哥羅家英。

雖然聲沙情況仍然康復當中,不過家燕姐都冇放慢腳步,呢個月尾就會去馬來西亞雲頂,聯同黎耀祥、陳展鵬、馬德鐘、胡定欣以及自己一班學生去表演。

 相關推薦

熱門搜尋