星光路上|相隔16年再奪視帝平靜滿信心 陳豪自覺虧欠太太支持對方追夢

星光路上|相隔16年再奪視帝平靜滿信心 陳豪自覺虧欠太太支持對方追夢

陳豪喺《萬千星輝頒獎典禮2023》憑台慶劇《破毒強人》再奪視帝寶座,阿Mo接受《星光路上》 潘盈慧 訪問,大談得獎感受同演藝路上嘅點滴。

阿Mo繼07年憑《溏心風暴》嘅「得得地」一角成為雙料視帝後,相隔16年再奪最佳男主角,佢坦言心情更平靜同有信心,而能夠喺太太陳茵媺(Aimee)手上接過獎項,更覺意義非凡:「係好special,難得由我太太頒畀我,其實最想我攞獎嗰個反而係佢。我嘅壓力係……我都想畀一個喜悅佢,但唔敢肯定畀唔畀到佢!最後宣布結果嗰吓我係開心嘅,再開心係能夠喺太太手上攞呢個獎。」

佢仲表示16年前攞獎,覺得個獎大過自己,而今次獲獎,自己嘅目光已經唔係只在獎項,最重要係印證自己所走嘅演藝之路係正確。
     
入行30年嘅阿Mo演藝之路曾歷高低,由模特兒走入電影圈,起初只係抱住搵錢心態「雙線」發展,後來覺得做模特兒既空虛又唔實在,所以先決定向演戲進發,可惜喺電影事業上發展未如理想。

雖然阿Mo有感心灰意冷,但佢都未有放棄,一直默默裝備自己,等待機會來臨,直到加入TVB,阿Mo有機會參演《妙手仁心II》,更自爆劇中經常「插袋」扮有型嘅原因,又話拍首部古裝劇《洛神》幾乎每一句對白都NG 50次以上,唔了解四字成語嘅佢,更將「瞻前顧後」講成「擔前顧後」,幸獲拍檔鄭子誠提點。

最後阿Mo隔空向Aimee發表愛的宣言,感謝對方願意喺事業黃金期時選擇結婚、為他生兒育女,並自覺虧欠太太:「我好支持佢出嚟拍戲,尤其小朋友開始大,想佢追求番自己夢想。」

星光路上丨馬貫東奪男飛躍自認實至名歸 感謝陳豪指導演技兼穩定情緒

入行18年嘅馬貫東,喺萬千星輝頒獎典禮2023獲得飛躍進步男藝員,已經多次入圍呢個獎項嘅阿東,事前就獲睇好係大熱人選,結果不負眾望,阿東話覺得呢個timing攞獎係非常完美,佢話:「過去18年我咩角色都做晒,而觀眾又接受,所以拎到呢個獎我自己都覺得實至名歸!」

今次獲獎係由陳豪頒獎,對阿東來講更加意義非凡,因為兩位喺劇集《破毒強人》合作無間,阿東話阿Mo喺拍攝過程畀咗佢好多演繹上嘅意見,又幫佢穩定情緒,所以先可以詮釋到杜飛呢個角色,最後仲可以由陳豪手中接過獎座,真係非常開心。

除此之外,阿東仲多謝屋企人一路以來嘅支持,令佢可以無後顧之憂咁追求自己嘅夢想,阿東坦言直至今日都未有能力畀家用,但佢好有信心喺不久嘅將來,一定可以畀家用,仲要畀夠五位數。

至於感情事,現階段單身嘅阿東就話,攞獎之後更專心打拼事業,希望嚟緊可以攞埋男配角,甚至視帝,所以感情事暫時係唔強求,一切隨緣!

 相關推薦

熱門搜尋