網上娛樂流料假消息成風 謝賢被指癱瘓陳淑芬出Post怒斥

網上娛樂流料假消息成風 謝賢被指癱瘓陳淑芬出Post怒斥

近年有唔少社交平台帳號,就唔理三七二十一,日夜以極鬨動標題所謂「爆料」,以大量流料呃流量。好似年初三赤口,唔少人都會避開唔拜年,新年流流相嗌唔好口吖嘛。但係就有平台指年屆87歲嘅 謝賢 四哥癱瘓入院,搞到啱啱同四哥見完面嘅 陳淑芬 即時貼合照闢謠。

網上唔少平台都充斥大量假料,最新就係四哥被指癱瘓

陳太嘅合照見到四哥精神十足,同前妻 狄波拉 等好友一齊現身,面帶微笑嘅佢髮型整齊面帶微笑,仲搭住拉姑膊頭,心情睇落好到不得了。反而係陳太見到網上消息大動肝火,決定初三要應一應赤口同呢啲假消息開年。

好友陳淑芬就出Post闢謠怒斥,指四哥身體情況良好

佢留言指:大年初二聯同大老爺及閨蜜狄波拉與四哥(謝賢)拜年,四哥精神奕奕,狀態超好,開心的有說有笑吃著蘿蔔糕,看看電視,非常開心!本來沒打算post這張合照,因突然看到Youtube的不實新聞,感到非常憤怒,新年流流,這樣詛咒位老人家,真係啋瘟這個歹毒的始作俑者,居心何在😡😡!特別發放這張今午與四哥(謝賢)的合照,讓大家放心!

可惜唔少人都對呢類新聞同平台資訊信以為真,難怪陳太咁勞氣喇

四哥前年以《殺出個黃昏》嘅演出,高齡85歲成為金像獎史上最高齡影帝,同年更橫掃電影評論學會、電影導演會同電影編劇家協會嘅大獎。16歲已經投入影壇嘅佢,多年來參演大量電影同電視劇,作品無數,不過近年相對減少現身公開場合。

林家棟向謝賢拜年大讚對方好精靈 計劃租歌廳為四哥賀九十大壽

謝賢日前被驚傳癱瘓送院,隨後陳淑芬即貼上同狄波拉一齊向四哥拜年嘅聚會照片闢謠。曾同四哥合作嘅林家棟喺出席謝票活動時就表示完全唔知有單咁嘅新聞,今年佢向四哥拜年時,四哥非常精靈,傾得開心更突然興起跳舞,令家棟話想等四哥90大壽時搵歌廳同live band,令四哥開開心心跳到夠。

同場仲有導演麥啟光、演員符家浚、姜卓文等一齊出席謝票,另外兩位男主角郭富城、任賢齊就因有外地工作而未能現身。電影宣傳工作雖然未有同期賀歲片強勁,不過就得到好口碑及大導演杜琪峯點名讚賞,令家棟同麥導好開心,仲話要等城城同小齊返港繼續宣傳,導演更話會請食飯。

 相關推薦

熱門搜尋