狀王之王丨王浩信《奪寶奇兵》造型黐脷筋勁爆笑 姚子羚變Sexy土耳其女郎晒馬甲線

TVB《狀王之王》噚晚講到「滅門縱火案」完結，旋即展開「至尊計狀元才」，呢個章節大玩計中計中計！劇情講到宋世傑（王浩信 Vincent飾）一行人去江西景德鎮，發現當地百姓飽受礦工老闆「王浩信」（古明華飾）折磨，不少人被「賣豬仔」去礦場做苦工，世傑喺老婆玲瓏（姚子羚飾）支持下決定揭發「王浩信」惡行！

「滅門縱火案」完結後，旋即展開「至尊計狀元才」，這個章節大玩計中計中計！

宋世傑查案期間發現「王浩信」與官二代談正堂（何浩文飾）有不當勾結，世傑遂設下「至尊計狀元才」騙局令「王浩信」與正堂上當……「至尊計狀元才」案件劇情反轉再反轉，加上角色大兜亂，非常過癮。先有古明華飾演賤格版「王浩信」，本尊Vincent更喺劇中玩自抽鬧爆「王浩信」指其蛇頭鼠眼、尖酸刻薄、卑鄙無恥、賤賤格格、跛腳岩巉、成頭瘌痢…

飾演宋世傑嘅王浩信玩自抽，鬧爆飾演王浩信嘅古明華，非常過癮。 王浩信化身「張振朗」。

Vincent 以《奪寶奇兵》造型上陣，除咗黐大粒癦兼講嘢黐脷筋，仲會搞笑化名「張振朗」；子羚孖住王子涵黐鬚化身山賊，金剛搽白塊面化身女人型。 問到點解化名「張振朗」，Vincent 受訪時笑言：「『張振朗』呢個名原本就係劇本寫嘅，唔係我自己加嘅，林子聰導演話因為古明華個角色叫咗王浩信， 所以將我個角色叫張振朗。」講到化身好友「張振朗」後要黐脷筋講對白，Vincent坦言有難度：「因為劇情要講啲人唔可以認得我係宋世傑，無論講嘢同動作都要有啲唔同，之前已經玩過口音，最後選擇咗『黐脷筋』，事前都要練吓點樣講對白。」

姚子羚化身索爆土耳其美女。姚子羚以性感露腰裝上陣化身土耳其女郎幫 Vincent 洗白白。子羚再度反串黐鬚扮山賊，佢好滿意呢個造型，仲話係全劇最靚嘅造型！

子羚黐鬚化身山賊，又要以性感露腰裝化身土耳其女郎，幫Vincent洗白白，向來身形Fit爆嘅子羚大晒健美馬甲線，子羚受訪時笑言好鍾意相關造型：「呢個造型係我成套戲最靚女嘅裝扮，原本仲Sexy啲，依家有露腰！」問到拍攝前有冇戒口以保最佳狀態？子羚笑指冇特別忍口，當時已經好瘦，因為拍攝呢套劇之前要練打戲，一路拍一路瘦，唔需要特別戒口，反而係需要增肥。

金剛化白塊面扮女人型。子羚勁風騷大跳肚皮舞。

《狀王之王》周一至五晚九點半翡翠台播映