佘詩曼歐陽震華為Benz雄太太賀壽 陳錦鴻罕有現身圈中好友聚會

許紹雄（Benz雄）近年移居新加坡，自2020年初打本畀愛女許惠菁（Charmaine）做生意，佢不時喺餐廳坐鎮幫忙睇檔，生活過悠閒生活，平時與家人逛街市買餸過打發時間，近日Benz雄回港探朋友，更全家出動去澳門睇楊千嬅演唱會，難得回港，當然要跟相識多年嘅好友歡聚。

佘詩曼與歐陽震華為Benz雄太太慶祝生日。

佘詩曼（阿佘）、歐陽震華、陳錦鴻、韓馬利、杜燕歌及黎芷珊等，跟Benz雄相識多年，原來佢哋約埋一齊為Benz雄太太龍嬿而提早慶祝生日；阿佘喺1999年拍第一套電視劇《雪山飛狐》，就係同陳錦鴻合作，阿佘曾喺《志雲飯局》講過陳錦鴻教戲好仔細，亦好肯教後輩。


佘詩曼與許紹雄曾於2009年合作無綫劇集《絕代商驕》，其後於2014年再度於劇集《使徒行者》結下父女緣。

陳錦鴻多年來為照顧患自閉症嘅兒子陳駕樺而減少幕前工作，甚少在港公開露面，間中喺內地登台，陳錦鴻與一眾老友仍有聯絡。而阿佘同歐陽震華就曾合作拍《帶刀女捕快》、《洗冤錄2》及《法證先鋒2》，二人劇裏劇外默契十足，每年生日都互相向對方送祝福，阿佘曾邀歐陽震華到家中作客，一齊上內地綜藝節目傾心事。相信呢次咁齊人聚會，阿佘、韓馬利同杜燕歌飲酒飲到面紅，就知佢哋必定盡興歸！
佘詩曼曾靠陳錦鴻教抽離角色，避免戀上對手。