鄧麗欣有絕招應付長輩催婚 張繼聰享受周圍拜年派利是

已屆適婚年齡但依舊單身嘅人士，每逢過年最擔心嘅，應該就係被家中親戚長輩關心婚姻大事，好似 鄧麗欣 都一樣有呢個困擾，不過佢就有絕招應對，就係你有你問，我有我唔答喇！

Stephy同新戲《飯戲攻心2》嘅拍檔張繼聰，一齊同大家傾下過年有咩習俗，Stephy話其實屋企人都好尊重佢，尤其近幾年已經冇再問佢呢方面嘅事，反而佢最記得係細個成日俾人問，大個之後要唔要選港姐喎！

而阿聰就分享家中過年習俗，佢話屋企長輩每年必買桃花，而自己都好享受周圍拜年同派利是，不過今年因為有新戲上映，所以過年期間應該見新戲拍檔多過見屋企人喇！

至於Stephy就話通常年初一會相約一大班好朋友聚會，大家一齊打麻將傾計，熱熱鬧鬧真係好開心呀！