王菀之向年青音樂人分享經驗 入行多年如重看廿年前自己

忙完賀歲片宣傳嘅唱作人 王菀之 早前為香港遊樂場協會嘅年度音樂企劃擔任星級講師，同學員分享音樂創作歷程，今次計劃早前分別邀請 林一峰 鄺敏慧 同 徐偉賢 擔任講師，而 周鍚漢 亦將擔任壓軸講一場Master Class分享。企劃終期匯演下月中舉行，一眾參與學員會透過音樂展現年青人的才能。

Ivana呢日分享成為唱作歌手近20年嘅經驗：「我同大家一樣都係由學樂器到鍾意寫吓歌開始，由唔知點樣將自己手寫出嚟嘅嘢變成錄製嘅歌，知道點錄製又唔識得推出，識得推出又唔識得宣傳咁樣，一路慢慢去學習。」多位學員先後向Ivana提問，Ivana被問到點樣保持創作初心話：「我要諗諗先，我應該係冇偏離初心，所以先搞成咁，都依然係為自己創作行先，所以有時要預咗曲風冇咁多人有共鳴。」

Ivana應邀同一班年青音樂人分享創作心得

Ivana更直言由落筆寫歌一刻，已能預估歌曲反應，又指創作標準應該由自己定義：「例如做音樂會，就做好人哋願意買飛嘅標準，至少做好自己嘅準備就好足夠。正如寫歌咁，演唱會就嚟啦，寫首賣飛嘅歌得唔得？得，咁咪《末日》囉。但係如果有日係我有嘢想講，寫首《Shattered》咪冇人聽囉，但係無論點，我都對自己作品有信心。」

為其他歌手寫歌時一樣有取捨，Ivana話會先聽對方至少10首作品，同時亦會為對方聲線度身訂造：「究竟你落筆去寫係為咩，為自己定為市場，如果人哋有要求，呢個係package嚟，就變咗你應該要付嘅責任，唔可以人哋要抒情歌，你夾硬要寫rap畀人，咁都係不負責任。」

佢仲提到自己嘅作品同為其他歌手創作嘅歌曲要分清要求

同學員傾到唔捨得走嘅佢，現場被學員瘋狂集郵，同年青人交流令佢回憶20年前嘅自己：「佢哋問嘅問題絕大部份我都有經歷過，好想同佢哋講，既然咁熱愛音樂、咁有天賦，唔好將佢變成自己嘅壓力，透過音樂去發揮自己係好幸福嘅事，希望佢哋可以繼續多啲創作。」

入圍嘅各個單位下月中將舉行匯演

即將迎接入行20年嘅Ivana又指，今年目標係推出全新專輯、演出舞台劇、舉辦香港同巡迴演唱會，不過紅館個唱一直未有着落，只因申請多年仍未成功：「紅館Book場嗰度，全港九都知道啦，真係要睇吓第十幾次申請先有啦，呢個神聖嘅場地，都申請咗幾年㗎啦。」