臨時劫案｜充滿香港特色杜Sir拍片大讚 小齊家棟車廂曖昧解困笑死

由 郭富城 林家棟 任賢齊 同 張可頤 主演嘅賀歲電影《臨時劫案》，上映個多星期以來獲得唔少影評人同觀眾激讚，大讚故事笑中有淚，其中「講多謝」同「Sorry」金句對白將唔少觀眾洗腦，戲中各個角色亦鮮明突出，係香港低下層縮影，加上遊走全港唔同地方拍攝，充滿久違嘅香港特色，就連殿堂級導演 杜琪峯 亦大讚《臨時劫案》係本年度最好睇嘅香港賀歲片。

賀歲片《臨時劫案》獲入場觀眾同影評大讚
 
《臨時劫案》導演兼編劇 麥啟光 ，曾為杜琪峯多部電影擔任過執行導演，好似《奪命金》、《毒戰》同《盲探》等等，而唔少影評同觀眾都形容《臨時劫案》甚有銀河映像風格，仲有唔少地方向杜Sir致敬。

杜棋峯亦大讚影片充滿香港特色
 
片中飾演「笠水」嘅家棟同老死「冇用輝」小齊其中一場對手戲，交代兩人被綑綁雙手雙腳，被困喺的士又黑又擠迫嘅車尾廂，家棟仲要喺極擠逼嘅環境伸手猛摷小齊褲袋，尋找手機求救。小齊回想話：「車尾廂好細，逼到大家嘅呼吸都感覺到，導演仲想我哋有曖昧感，要我用口幫家棟撕走黐係口嘅大力膠布，同家棟口水都交換埋，佢隻手又亂摷，我忍唔住叫咗吓唔好，拍完一晚感覺全身都散晒。」

家棟同小齊呢對好友被拉上陣打劫，仲有一場非常曖昧，搞笑度十足