李龍基返港急赴懲教所探監 老淚兩落承諾迎娶澄清物業傳聞

學歷同專業資格受盡網友質疑嘅 李龍基 36歲未婚妻 王青霞 ，日前涉嫌逾期居留同使用虛假文書等6項罪名，被當局扣查20號提堂，裁判官即時拒絕保釋申請還押看管。

李龍基 星期三由內地公幹返港，一臉肅穆步出高鐵站，唔止招牌粉紅瀏海消失，更係一面愁容強忍眼淚，亦簡短回應傳媒提問，更指若未有香港身份嘅未婚妻被當局遣返，亦唯有接受現實，更指完全冇諗過事件會發展到咁嘅結果。

之後基哥自行驅車趕往懲教所核實身份，不過等候辦理手續期間就再次當眾落淚，而正式探望後情緒轉趨冷靜嘅佢，再次受訪時就指見面時雙方都非常激動，再直指答應對方一定會迎娶過門，叫Chris唔使擔心。

基哥對外界認為未婚妻係因為錢同物業而接近自己，佢就當天發誓，稱對方未曾於自己身上「搵過一個斗零」，仲話如果有發現蛛絲馬跡的話自己一早已經斬斷情絲。基哥話未婚妻見面時向自己道歉，自己亦希望對方受到今次教訓後「重新做好人」。

雖然早前網上連環爆料指Chris於外地有騙婚之嫌，又指名下7個物業都已送贈對方，不過呢日被嘲「提款基」嘅基哥就澄清，指物業早於上一段婚姻結束時已贈與前妻「淨身出戶」，並非外界所傳與過戶予Chris。