星光路上｜游嘉欣「天意」促使入行 人細膽大為事業向前衝

作為「TVB第一個00後」嘅游嘉欣入行時間雖然唔長，但演出機會多多，成為觀眾熟悉嘅青春小花之一。入行第二年，游游就為自己立下「五年內一定要拎獎」嘅目標，而今年佢就喺《萬千星輝頒獎典禮2023》奪得「最具潛質新人獎」，踏上頒獎台接過獎項、發表感言嘅心情，游游久未忘懷。

游游接受 潘盈慧 《星光路上》訪問，分享入行經歷就好似「一切自有天意」一樣，本身想參選港姐增加人生閱歷嘅佢，喺糾結期間嘅某一日，就喺社交平台收到一封私信邀請佢做J2節目《電競王》嘅主持。雖然游游未有選成港姐，但當年嘅港姐Pormo就搵咗嘉欣拍攝，令佢由想參選嘅人變成扮演想參選嘅人。

回憶第一次拍劇嘅經驗，游游覺得好幸運自己喺《香港愛情故事》嘅角色同現實自己好相似，所以冇太大難度。不過令佢覺得好有挑戰性嘅就係喺劇集《回歸》一場爆喊戲，為咗可以表現得好，佢花費唔少心思培養情緒。

游游喺上年同肥媽、李家鼎主持烹調節目《肥媽李鼎》，呢個組合產生出令人驚艷嘅化學反應。當游游知道要同兩位大前輩合作時驚都冇驚過，拍攝時亦得到節目組鼓勵，令佢好安心放膽做。

雖然事業得意，但游游喺愛情方面好似冇咩大進展，不過佢就抱住隨遇而安態度去面對。