本尊就位丨黃嘉樂拍劇撞正籌備婚禮感激太太付出 孔德賢連踩兩劇喊足兩個月到開竅

TVB劇集《本尊就位》今晚八點半翡翠台播映大結局，噚晚（22號）劇情講述穿山甲妖轉世嘅現任鎮長辛正義（黃嘉樂飾），用詭計偷 去王母娘娘髮簪；為了搶回法力高強的髮簪，呂洞賓（謝東閔飾）要求雪花（陳嘉慧飾）釋出「牡丹仙子」（陳嘉慧分飾）元神四出感應髮簪下落。與此同時， 木昆（孔德賢飾）遭正義設局踢爆神棍真面目，鋃鐺入獄兼被判死刑，最終獲直楠（鄭雋熹飾）幫忙成功逃獄。

黃嘉樂呢幕雨中爆喊戲一絕。黃嘉樂演技顏值俱獲讚。

另邊廂「牡丹仙子」元神喺尋簪期間被正義捉走，及後「牡丹」元神雖趁呂祖與正義大戰期間逃脫，卻因迷路未能返回肉身，令雪花生命危在旦夕，至於戰敗嘅呂祖則被正義封印喺石堆之中……今晚（23號）大結局，呂祖、木昆及穿山甲妖將展開終極大戰，向來自私嘅木昆更會為顧全大局捨身成仁…

見到阿爸喊成咁都仲要咁冷淡，好心寒。黃嘉樂眼神好狠及笑容好奸。

《本尊》結局周劇情發展主要圍繞穿山甲妖轉世嘅正義，而飾演正義嘅黃嘉樂雖然係奸角，但由於角色性格並非大奸大惡、只是過於執著，加上對雪花一往情深，嘉樂演繹到位，故正義自出場後一直吸獲不少正評。除咗顏值獲讚，網民讚嘉樂演技開竅兼「奸得有型過人」，封佢為「民初版夜神月」。演技方面，日前正義為幫亡母（黎燕珊飾）報仇、邊哭邊追殺金爺（韋家雄飾）場口，嘉樂成功演繹出極憤怒，同時而又極心痛嘅狀態，完全有「分不清是雨還是眼淚」感覺，加上多幕冷眼、霸氣及奸險等唔同表情突襲，令人睇得心寒又肉緊。

辛正義當面踢爆木昆神棍身份。

嘉樂坦言為角色花咗唔少時間做功課，感激太太無私付出：「好多謝大家有正評，對一個演員係非常之好嘅鼓勵。講到嗰場（雨中）喊戲，我覺得可能同我自身經歷有啲關係，因為我爸爸過咗身以情緒上嘅代入會比較容易，全靠劇本賦予呢個角色唔少細緻位。拍呢套劇嗰時，我其實係準備緊婚禮，但太太為咗令到我可以安心演戲，佢同我講『婚禮嗰啲嘢我會全程負責，你只要專心做好你嘅工作就得』，佢仲叫我要交足功課，把握好每個機會。 作為一個演員，做咗成20年，我唔可以辜負人哋畀我嘅機會，要對得住自己，每一個角色係一個好嘅機會。」
嘉樂竟然搞笑地發表愛妻宣言：「我要多謝我爸爸、我媽媽，要多謝我太太令到我咁快樂。我覺得一個人開心，係容易啲保持到自己個外表。」

辛正義做事雖然硬繃繃，但對雪花卻一往情深。大結局對決相當精彩，萬勿錯過。

孔德賢（Danny）喊戲亦大有進步，噚晚呢場雪花及呂祖探監場口，木昆拎住饅頭狼吞虎嚥、兼邊食邊喊邊懺悔一幕相當有感染力，不但演活百感交集嘅內疚情緒，更哭至涕淚交連相當入戲；更誇張嘅係即使唔係主角場口，Danny會根據劇情「話喊就喊」，以致喺大wide shot中、亦能睇到Danny兩行閃閃發光嘅眼淚。

孔德賢呢幕喊戲真係做得好好。

談到喊戲愈演愈好，Danny 全靠演《你好，我的大夫》 後開咗竅，並坦言自己也確實愈拍愈入戲：「嗰時係《大夫》同《本尊》疊住拍，我斷斷續續喊咗成一、兩個月；同埋監牢場戲因為拍到尾聲，我真係完全代入咗陳木昆嘅角色，覺得講咗咁耐大話好對唔住大家，因為東閔同嘉慧好畀到情緒我，所以啲眼淚係真情流露。」

《本尊就位》今晚八點半翡翠台播映大結局。Danny 全靠演《你好，我的大夫》 後開咗竅，並坦言自己也確實愈拍愈入戲。 到底雪花最後同木昆會唔會開花結果呢？