婚後事丨王敏奕演活嫵媚戀愛狂角色 賴慰玲演孤獨拜金女過足戲癮

以多角度探討愛情同婚姻世界嘅都會愛情劇《婚後事》，為咗喺劇集開播前令觀眾更了解六大主角基本人設同愛情觀，無綫官方社交網專頁喺21號發布咗7張金句圖，包括６大主角愛情觀嘅懶人包、羅子溢同陳自瑤劇中女兒點睇父母離異嘅心態、以及幾位主角人設嘅描述。
 悅悅點睇父母離婚。
自人物介紹同劇集宣傳片陸續曝光後，其中一大焦點落喺王敏奕嘅「蛻變」上，對於佢舉手投足、甚至聲線都演活「致命誘惑」Mira時，王敏奕笑言同真實嘅自己有好大出入，並透露因而曾遭監製林肯嫌棄：「現實世界嘅我係唔識做呢啲嘢，所以拍之前我都有去睇某啲戲做吓功課。但因為喺潘善仁視點、我需要更加誇張咁去演呢啲（嫵媚）行為，我記得第一日拍時，監製嫌棄我做得唔夠好，話我唔識誘惑人。」敏奕又坦言很喜歡劇本的多角度說故事構思：「所以我一早知道自己需要演唔同人眼中嘅呂靜海，對一個演員嚟講，係一件好有挑戰性同好有趣嘅project。我亦都多謝監製同編審咁睇得起我，覺得我可以演繹到致命誘惑。」
王敏奕話當初畀監製嫌棄。
而喺官方23號發布嘅劇照入面，王敏奕喺同一場口中，竟有清爽VS保守兩種唔同打扮，帶出唔同視點下、同一件事嘅伸延性及多樣性。而除咗同場口嘅反差，王敏奕喺整套劇嘅前後反差亦相當驚人，喺劇中經歷咗接近20年人生變化嘅Mira，雖然想盡量堅持活得簡單率性，但面對生活上各式各樣難題，Mira卻失去昔日嘅艷光，更由「天跌落嚟當被冚」變成滿腔不滿嘅黑面怨婦，仲會挑戰連串爆Seed暴走場口，當中嘅巨大反差令人期待。
賴慰玲演孤獨拜金女。
同王敏奕喺劇中保持相愛相殺關係嘅賴慰玲，亦坦言今次拍攝過足戲癮：「呢個角色好兩面，表面好風光，但內心其實好孤獨，一個咁大反差嘅角色，對演員嚟講係具備咗好豐富嘅素材去演。」賴慰玲話呢個角色係佢從演以嚟喊得最多嘅：「嗰種喊仲要係好壓抑嘅，即係好想喊又唔畀自己喊，我覺得好寫實，好多人其實想喊時都會想撳住自己。我亦都鍾意劇本多角度嘅講故仔方法，即係我睇我情人可能好壞，但當我情人睇返我時，原來係我促成佢變成我眼中嘅壞人，而第三者睇又可能有另一啲睇法，我覺得寫得好細膩。」

《婚後事》由2月26日起 逢星期一至五 21:30 翡翠台

賴慰玲話呢套劇嘅角色令佢過足戲癮。