星光路上丨周奕瑋感謝曾志偉開導走出迷茫期 曾被評著西裝似企鵝感恐懼

周奕瑋（Jarvis）勇奪《萬千星輝頒獎典禮2023》最佳男主持，呢日接受TVB娛樂新聞台節目《星光路上》訪問，與拍檔 潘盈慧 暢談工作路上曾陷入迷茫期，幸有志偉哥給予鼓勵，令Jarvis睇清楚前路及未來方向。

Jarvis坦言上台時一啲都唔淡定，記得2021年入主持10強，Jarvis被安排負責大姐明同鵬哥爆肚時要幫忙執生，結果Jarvis轉數夠快嘅表現被幕後同事睇中，Jarvis翌年就多咗機會喺1廠開工；Jarvis回想入行初期曾被批評著西裝似企鵝，佢笑言對腳係得咁長，但係呢啲言論對佢面對工作係有恐懼，Jarvis有次被安排去外國一個影展：「我細路仔身形尤其呢啲外國影展，歐美記者個個大隻，行埋去真係似15、16歲，企喺度已經輸一半，新入行嘅小朋友有時會被推開。」Jarvis更指嗰次有機會訪問木村拓哉，絕對係超越地球級嘅訪問，壓力好大！

Jarvis亦感謝曾志偉給予鼓勵，讓Jarvis走出迷茫期，Jarvis喺迷茫期曾諗過自己係咪適合呢個行業、係咪人生只係得呢個行業，Jarvis好想試吓畀自己更多可能性。Jarvis回想有次志偉哥得知佢有啲迷茫，志偉主動鼓勵Jarvis喺司儀方面仲有好多機會發展，幫助Jarvis睇自己條路有更多方向。

Jarvis回想喺娛樂新聞台工作冇幾耐，差唔多想遞信辭職前，被安排做東京電影節採訪、5月又去康城影展，Jarvis回港後毅然決定去日本留學，幸好有舊同事挽留，繼續留喺呢行發展，先有目前嘅成績。