再見枕邊人丨張曦雯喊唔停挑戰大黃智雯分飾年輕版顧晴天「零違和」

TVB新劇《再見‧枕邊人》逢周一至五晚八點半翡翠台播映，以剝洋蔥式手法逐步邁向真相，《再見‧枕邊人》故事一開出即見到女主角顧晴天（黃智雯飾）喺懸崖邊亡命奔跑，之後跌落山崖；相隔7年，失憶嘅晴天從印尼回歸，並喺律師好友金長勝（羅天宇飾）幫助下尋找過去，可惜面對過去最親嘅人，晴天只有陌生感覺…另邊廂晴天前夫楊萬森（馬德鐘飾）決定忘掉過去及晴天重新開始，就喺佢與紅顏知己朱善美（張曦雯飾）大婚當日，晴天突然殺出令婚禮延期，一段緊張三角關係，以及反轉再反轉「尋找記憶」之旅正式展開…《枕邊人》結構亦相當特別，每集開首均有一句點題slogan，每集結尾均刻意留下一啲類似線索嘅碎片式片段，以增加劇集懸疑度。

故事主線前後橫跨長達七年。張曦雯一出場就晒喊功。張曦雯呢個婚紗 look 好亮麗，仲隱約見到老鼠仔。

為咗配合「尋找回憶」情節，年輕版晴天不時會喺劇中現身，並由黃智雯（Mandy）分飾；雖然失憶七年與年輕版嘅晴天年齡至少相差十多歲，但Mandy無論演繹邊個年紀均「零違和」，年輕版嘅晴天散發一股充滿青春活力嘅甜美感，足證Mandy保養得宜。

大婚之日，愛人嘅前妻突然殺出，搞到婚禮延埋期。Kelly 飾演嘅朱善美雖然表面上冇嘢扮晒好 understanding，但其實暗地裏其實嬲到爆。對於過去，晴天冇晒印象同感覺。

飾演楊萬森紅顏知己嘅張曦雯（Kelly），首集大曬亮麗貼身婚紗look，喺同一集結尾及第二集仲會分別展示弗爆水底芙蓉Look及做gym Look，將其美好身段表露無遺，關鍵在於Kelly平時勤做運動，每星期會去大約5次健身室，每次運動時間不少於2粒鐘，Kelly又經常做瑜伽及重量訓練鍛鍊身材，難怪噚晚其中一幕手臂上老鼠仔若隱若現。Kelly首集甫出場即要展現喊功，坦言《枕邊人》係其從演以來喊得最多嘅劇集：「呢套劇真係喊咗好多場，有時開工都會諗：『今日又要喊？』。我之前啲角色係開心、甜美啲，同埋性格直接，今次呢個角色除咗好多情緒同秘密，亦好多喊戲，真係好大挑戰同好有滿足感。」Kelly續指為咗投入角色：「我每套劇開工前會寫好多角色嘅背景資料出嚟，幫助自己了解個角色。另外我又會搵啲歌去配合番個角色性格同埋經歷，然後日日揸車返工時都聽住啲歌，令到自己更易進入個狀態。」

面對過去最親的人，晴天只有陌生的感覺。但當見到親生兒子同第二個女人相處得咁開心，晴天又忍唔住流下感觸嘅眼淚。Mandy飾演嘅年輕版顧晴天勁有說服力。每集結尾又會留低一啲伏線，勁有心思。晴天墮崖後流落印尼，昏迷咗成六年半先醒番，究竟關唔關前夫楊萬森事！？