張致恒老婆壓力爆煲曾想輕生 自揭兒子患自閉症及過度活躍症

張致恒（Steven）同老婆區燕雯（雯雯）奉子成婚更四年抱四，雯雯經常因家庭瑣碎事同財政問題擺上網同大家傷心share。踏入新一年，張家又再遇到新挑戰，呢次唔係Steven唔生性被老婆放上網鬧爆，而係雯雯凌晨喺社交平台自揭家人患癌、愛犬出事、小朋友患上自閉症及過度活躍症，各種連環不幸事件，令雯雯曾有過輕生念頭！
 
雯雯凌晨喺社交平台自揭家人患癌、愛犬出事、小朋友患上自閉症及過度活躍症。

雯雯以「2024一開始就已經好不幸」為題喺社交平台出po，分享兩名親人患癌、兩隻愛犬健康出現問題，以及因為「有一個小朋友確診autism plus hyperactivity」，令佢筋疲力盡，佢認為照顧呢類小朋友係對身心情緒好大嘅學習，雖然可以一拖四照顧到，但會有一定嘅危險，而最近危險嘅事真係發生：「最近小朋友先跌爆咗隻耳仔，醫生同我哋講呢類小朋友一年起碼會去幾次急症室，要有心理準備，而家每一日面對佢嘅行為情緒係一個好大嘅挑戰。同時因為屋企其他嘅小朋友仲好細，亦都受到影響，我哋要好努力學習點樣可以得到一個平衡。」
 
各種連環不幸事件，令雯雯曾有過輕生念頭！

雯雯形容過去嘅2023年係接近壓力爆煲嘅一年，爆出唔同情緒，先成為大家嘅「笑料」。佢又透露曾有輕生念頭：「連我自己都覺得我自己有精神問題，經常會出現一個惡魔叫我帶埋小朋友離開呢個世界，就可以得到解脫。」雯雯明白要照顧屋企要兩人齊心，冇咗是但一個根本係冇可能做到。所以雯雯特別感謝老公不斷學習照顧小朋友：「呢段時間我好多謝Steven Cheung不斷學習點樣照顧好小朋友，實實在在多謝你同我一齊面對全世界嘅責罵（話我哋只係識借錢，又唔自己出去做嘢）。當中嘅難處，只要我哋先會明白。」
 
雯雯形容過去嘅2023年係接近壓力爆煲嘅一年，爆出唔同情緒，先成為大家嘅「笑料」。

過去幾年，張家多次被指欠債繼續高消費，近期有傳Steven疑似向蔡卓妍（阿Sa）借錢唔還嘅錄音曝光，令Steven再度被鬧爆死性不改。雖然財政係張家面對嘅最大難題，但為咗照顧小朋友同替雯雯分擔壓力，二人有共識做多兩份工，請一個姐姐去幫手。雯雯仲話：「好慶幸仲有唔夠兩個月時間，姐姐嚟到我哋就可以重生，終於可以靠自己唔需要再求別人嘅幫忙。」
 
雖然財政係張家面對嘅最大難題，但為咗照顧小朋友同替雯雯分擔壓力，二人有共識做多兩份工。

最後雯雯坦言經歷多件不幸事件後令佢有覺悟：「其實生活靜靜地平凡安穩就足夠。自己嘅情緒自己知道就足夠，如果能夠過到依兩個月，我希望同自己嘅家人能夠搵一個地方靜靜地渡過，遠離呢個公開又複雜嘅地方。」