陳子聰大病後首演感恩身邊一切 何超儀坦言無得同個天鬥

前年喺澳洲因為大動脈撕裂導致內出血，一度命危嘅 陳子聰 ，經過近兩年幾同接受過多次大手術後，加上得到太太 何超儀 悉心照顧，相隔四年呢日終於再次踏上舞台，同組合  廿四味 再度合體，參與戶外音樂節演出。

身穿鮮綠色外套嘅子聰喺台上非常搶眼，留長髮嘅佢面容飽滿兼活力十足，同隊友一齊又唱又跳，玩到唔捨得落台，在場嘅觀眾亦以熱烈歡呼聲歡迎佢重返舞台，連超儀都都情緒高漲高舉手中兩支拐杖。

講到再次出騷感覺，子聰難掩興奮心情話「好開心呀，都有少少緊張。」佢話當身體慢慢康復兼且可以行得、食得之後，就諗梗幾時可以再上台，因為成日睇到隊友演出就有啲羨慕。身邊嘅老友Brian話之前見到子聰郁到同埋可以一齊食飯已經好開心，之後聽到子聰講話或者會一齊上台玩，佢哋都有嚇親，相信再座大家如果見證過子聰嘅事都會有呢個感覺。Brian亦投訴話好唔公平，點解子聰幾時出嚟都咁靚仔，成個木村拓哉咁。

走出鬼門關，子聰都有好深體會，四月亦會再到美國做手術，佢語帶平和話慢慢嚟，一步一步咁做。佢亦好感激香港嘅市民，因為不論喺咩地方，大家都會走埋佢身邊祝佢身體健康，畀咗好多支持同愛佢。能夠見到太太上台演出，佢都好開心，佢話只要有機會睇騷已經好開心，尤其咁耐之後可以再睇到現場騷，係一個幸運，佢仲話自己係一個好幸運嘅人，凡事都會覺得開心，只係飲水都會覺得幸福。

曾經喜愛夜蒲嘅子聰，近年自從身體先後出現問題之後，佢都修心養性，仲自爆2016年之後已經無再飲酒，仲笑指自己以前已經飲夠。子聰話經歷一啲事之後，會好感恩自己嘅生命，所以自然會學乖。

超儀見到老公回復昔日風采，大讚老公表現一百分，喺台上非常有型，佢仲話原來子聰呢晚上台件搶眼外套，係佢捉老公去買。講到老公被老友讚靚仔，超儀爽快就話老公天生就係無可能醜，只係睇骨架已經唔需要再講其他，問到係咪因為有妳嘅愛所以保持靚仔？超儀斷言話「無錯，我緊張佢呀嘛!」

佢仲話老公每個禮拜做4日物理治療，而家體力仲好過自己。至於喺街上收到好多市民祝福，超儀自認係神婆，歡迎大家不停送上祝福，因為佢覺得無得同個天鬥，但係當大家都祝福自己，個天都會睇到大家嘅心。