獨家丨直擊《中年好聲音2》7強排舞情況 古淖文展現超強跳舞實力

歌唱選秀節目《中年好聲音2》將會喺3月24號晚舉行總決賽，7強選手各要準備一首慢歌、一首快歌 同埋一首必殺歌，總共3首歌吸迎戰。

TVB娛樂新聞台呢日就獨家嚟到排舞房直擊大家排舞嘅情況，首先有被公認係唱跳最叻嘅古淖文，佢首次排練已經極速同Dancers夾好隻舞，佢就話因為自己之前拍咗段片，喺屋企不斷睇盡量記，嚟到排舞老師再幫佢mark位。問到佢有冇同谷婭溦一齊加操？古淖文咬牙切齒咁話對方不停督促自己練習，笑言係受到對方嘅虐待呀。

對於自己演出時有手震問題，古淖文話自己已經搵到根源，覺得一切都係心態問題，自從上次放開同谷婭溦演出《Bad Boy》後，已經再冇手震問題。

面對唱跳實力強橫嘅古淖文，大魔王安雅希亦越戰越勇，快歌環節都勁專注學舞，佢話自己喺《中年好聲音2》入面未試過跳舞，對於未試過唱跳嘅佢嚟講係一個好大嘅挑戰，但佢話相信只要肯努力，冇咩係做唔到呀。講到之前畀評判話佢因為減磅而影響咗把聲，安雅希表示而家都有食返少少飯，仲話自己已經好得七七八八，希望到時嘅表現會令大家滿意呀。

顏米羔上次以高難度歌曲出戰，唱到青筋都凸起，決賽夜佢就再拎自己條青筋出嚟唱快歌，排練嗰陣都驚佢唱到斷氣。事後顏米羔都話排到上氣唔接下氣，仲令佢覺得除咗肺容量要夠大外，吸氣都要吸密啲。

唔少選手都畀唱跳呢part難到，連平日睇落唱跳唔錯嘅陳俞霏都話想搵幫手特訓，仲話自己見到都已經有啲腳軟，加上成日同手同腳而畀老師鬧呀。而一早講咗好驚跳舞民part嘅譚輝智同沈宗賢，就𡚒力迎戰解放盤骨跳舞呀。