洪永城太太梁諾妍誕7磅重細女洪啤啤出世

洪永城 太太 梁諾妍 （Inez）一向熱愛做運動，去年12月初宣布再做媽媽，懷孕期間仍然好動，今日佢哋報喜稱細女「Sir Face 2.0」洪啤啤出世啦！

恭喜Sir Face 2.0洪啤啤出世喇！

洪永城與Inez嘅細女Beryl喺荃灣港安醫院出世，B女重7磅2，佢哋指細女有「SIR NOSE」，二人開心稱：「多謝你選擇我哋做你父母，我會係你和家姐最強嘅後盾。」 Inez由於第一胎食全餐關係，為咗避免同上次一樣，今次佢開刀生B：「由於第一胎我係震痛到瘟瘟沌沌，今次嘅剖腹產對我嚟講好似第一次體驗咁，當聽到妹妹出世嘅喊聲 我同洪爸爸都忍唔住，捉住對方隻手一齊感動到喊出嚟。」

好動媽媽Inez抱住細女Beryl萬事足

二人感覺太奇妙，當見到足晒磅嘅B女健健康康出世，成隻粉紅肉肉豬仔咁，Inez都倍感安慰，佢多謝老公一直陪伴，繼續組織一個又熱鬧又溫馨嘅家庭。洪永城喺IG亦有分享再為人父嘅喜悅：「我好高興嚟到呢個家庭，我有個好為食嘅大家姐Molly ，又有一個非常好動嘅二家姐，所以我決定傳承佢兩個嘅優點成為一個又為食又好動嘅三妹，同埋我偷聽到爸爸話一定會帶我周遊列國去旅行喎，好嘢！」

前世情人Daddy洪永城即刻忍唔住肉緊狂錫

洪永城與Inez於2021年結婚，同年誕下女兒「Sir Face」洪靖嵐（Amber），去年底宣布懷有第二胎，「Sir Face 2.0」預產期喺4月，早前Inez影索爆大肚相送彩蛋，加插一張洪永城「孕味濃」嘅照片，見洪永城交足戲，網民大讚洪永城好正。

一家四口合照非常溫馨