世界養生組織|Yoyo翠如㩗手學舒壓養生 森林浴庳修瑜伽解積聚壓力

世界養生組織|Yoyo翠如㩗手學舒壓養生 森林浴庳修瑜伽解積聚壓力

以養生為主題嘅13集原創節目《世界養生組織》,兩位主持 陳自瑤 同 黃翠如 為觀眾搜羅各式養生之道,介紹唔同妙法助你延年益壽。由別開生面嘅森林浴、花藝養生, 到傳統嘅瑜伽、音樂治療都包括在內,總有一種適合你。

趁年青保養身體, 養生已經係而家唔少人嘅畢生事業,噚晚節目首集介紹「森林浴」。Yoyo 同翠如去到慈山寺,由山林療癒陪伴員帶領下感受大自然嘅靈氣,接觸花草樹木所發出嘅能量。

Yoyo同翠如嘅節目會親試唔同養生舒壓方法

佢哋赤腳喺草地上行走,就如重投大自然一樣。Yoyo受訪時就提到呢次體驗︰「同行山好唔同,森林浴講究專注自己嘅感受,放鬆心情聆聽大自然嘅聲音,感受自己嘅感覺。」喺指導下佢哋擁抱寺中嘅菩薩樹釋放負能量,Yoyo事後話︰「人會calm啲,抱嘅時候我同大樹講今日好開心有呢個緣份,可以遇見佢、攬住佢,等我充滿愛同正能量,菩薩樹畀我感覺好似一位長輩滿有智慧同慈愛。」

而翠如同菩薩樹話別時就話︰「我嘅道別方法係將心中嘅重擔,向大自然訴說,希望自己下次再嚟嘅時候,可以將呢啲重擔放下。」 之後佢哋又學習「行禪」同「茶禪」等禪修心法。行禪步伐就如粵劇大老倌登場,緩緩踏出每一步,期間思考淨空心靈。而茶禪嘅首要就係合上眼深呼吸放鬆身體,再透過聞香同品茶,安頓悸動的心靈,從而達至養生。

近年大熱嘅瑜伽亦都非常有助於抒解壓力

而今晚播出嘅第2集,Yoyo同翠如會拜訪正念瑜伽導師Janet Lau,學習恢復身心靈健康。正 念瑜伽係藉動作同冥想,達致身心靈平衡。已有多年瑜伽經驗嘅Yoyo喺接觸到正念瑜伽後大嘆:「而家先知道瑜伽可以用地、水、火、風(四大元素)演繹,真係井底之蛙。」

現代人真係要學識好好放鬆自己

作為瑜伽初哥嘅翠如表示呢次係越級挑戰,仲笑言:「Janet係瑜伽導師嘅導師, Yoyo係學咗好耐瑜伽嘅同學仔,我係咪上錯班呢。」 Janet講解四大元素同心靈健康息息相關,四大元素以地代表骨骼;水代表身體嘅液體好似口水、胃液等;火就代表人體消化系統;風代表呼吸。翠如向導師透露生活中經常有一股無形壓力,令自己透不過氣,想知道最後佢點由導師引導下,用正念瑜伽平衡身心,舒壓學習同問題共處,就要留意今晚節目喇。

《世界養生組織》星期一至五晚 21:30  J2(82台)

熱門搜尋