陳法拉產後首現身狀態一流 即日來回紐約洛杉磯趕湊BB

日前宣佈再誕一子湊齊「好」字嘅 陳法拉 繼產後即接受國際傳媒訪問宣傳怪獸新片之後，呢日亦於洛杉磯首次公開露面，為佢參演嘅第2部荷里活電影《哥斯拉×金剛：新帝國》出席首映禮。

今次同佢上一部荷里活電影《尚氣》喺同一場地舉行首映，以名單最新春夏服飾登場嘅佢，喺片中飾演伊維族女王，同族人奮力對抗滅世力量，容光煥發登場嘅法拉仲話：「生完B咁快可以復工覺得好榮幸，其實冇特別修身，都係靠團隊幫我扮靚。電影拍攝完成已經一年有多，見到咁多舊同事感覺好親切、好開心。」

不過呢次行程其實緊湊，法拉同老公即日來回紐約同洛杉磯，首映禮一結束，兩公婆就急住飛返紐約照顧小朋友喇。佢又特別多謝爸爸媽媽幫手，更大讚老公唔怕辛苦，相當貼心陪伴左右：「多得有佢，幫我拎住大袋細袋嘅嘢，做咗我助手，我哋都好心急想趕返去見兩個小朋友。」