《黑色月光》華麗陣容煞科完成 茜堯被詐形急回歸媽咪身份

演員陣容豐富嘅新劇《黑色月光》呢日正式煞科，經歷3個幾月拍攝之後順利完成，而齊集劇中嘅視后 林夏薇 同事隔兩年再拍劇嘅 楊茜堯 ，加上視帝 王浩信 嘅華麗陣容，仲有 馬志威 馬貫東 楊明 等，呢日齊齊舉杯慶祝拍攝順利完成。

茜堯仲指因為已經兩年冇拍劇，已經不捨相處多時嘅台前幕後，仲話3個月轉眼就過呀。而薇薇仲話9年後再同茜堯合作，結論就係一個「爽」字，加上首次合作嘅浩信同其他演員，今次體驗非常過癮呀。

而Vincent亦都話同幾位好對手火花十足，自己非常喜歡呢部劇集，希望播出時觀眾都會鍾意咁話。

新劇於內地同香港拍攝，要兩邊走嘅茜堯就話因而被囡囡投訴，嫌少時間陪自己，仲話要為乖囡安排復活節行程去樂園見公主呀。而同劇嘅薇薇就要忙住生意同其他工作，至於Vincent就話要爭取時間喺下個工作前嘅空檔同家人相聚喇。