《中年好聲音2紅白大戰》兩隊成員率先曝光 周吉佩支嚳儀各自領軍做隊長

《中年好聲音2》賽事圓滿落幕後，一眾中二生古淖文、譚輝智、顏米羔、安雅希、林若盈、陳俞霏等緊接忙於為《中年好聲音2紅白大戰》綵排，紅組由支嚳儀(Venus)做隊長，率領《中聲2》冠軍古淖文及季軍顏米羔助陣，透露會有好性感環節應戰。

古淖文就大賣關子話聲音可以好性感，大魔王安雅希會拍住Venus合作唱跳，帶畀大家耳目一新感覺；而白組則由《中聲1》冠軍周吉佩領軍，有亞軍譚輝智同殿軍黃劍文呢兩位人氣擔當，新一代舞王譚輝智夥拍隊友跳一part草蜢嘅快歌，仲會擔大旗企C位，而黃劍文則solo日文歌。

譚輝智成為《中聲2》人氣王後，近日連屋企人都成為焦點，大家讚譚太太好靚女，對此譚輝智幽默回應：「佢一定好開心啦，講明先各花入各眼，佢平時戴口罩，嗰日化晒妝嚟。爸爸都好有準備，我第一次上台佢已經着套好閃西裝嚟，期待啲人會話你Daddy都好唱得，捉佢落嚟唱吓歌，佢真係咁樣幻想，可惜冇發生到。」

陳俞霏雖然表面精神唔錯，其實原來係帶病上陣，仲被陳蒨葶爆佢食物中毒痾足七次，好彩冇影響綵排，林若盈透露佢哋演出充滿感動、笑料、可愛及舞動。