聲夢1+2｜專屬綜藝！張馳豪與侯雋熙展麒麟臂惡鬥 水上競技吸晴 炎明熹獻唱助興

聲夢家族終於有專屬綜藝，全新音樂競技節目《聲夢1+2》喺3月30號星期六晚上8點登場， 一眾有份參演嘅藝人現身記招宣傳，公布精彩內容。兩季《聲夢》學員分成Red Team同Blue Team進行音樂類遊戲比拼，團隊除咗喺香港拍攝外，仲會移師去澳門取景。

預告片中見到《聲夢1》同《聲夢2》兩位大隻仔張馳豪（Aska）同侯雋熙（Duncan）出動麒麟臂玩遊戲，Aska預告節目遊戲規模超出大家想像，例如規模大型估歌仔、不同玩水設施，將會帶畀觀眾震撼感。身旁嘅林智樂（Felix）就大表遺憾未能參與玩水上遊戲，慨嘆錯過大家靚樣。

節目除咗一班鐵腳之外，每集會有歌手外援嘉賓助陣，首集邀請谷婭溦及黃山怡（糖妹）做嘉賓玩遊戲，仲有炎明熹獻唱，潘靜文（Sherman）率先爆一班嘉賓仲玩得癲過佢哋，尤其係谷婭溦，唔只鏡頭前玩得癲，鏡頭後大家仲癲，笑料多到可以拍攝多一個節目！